Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ Hoe Godt de boosheydt straffet, de gheloouige leydet, beschermt ende onderhout, hoe hy haer goet doet ende veel wonders om harent wille werct.

1

⁺ DOen^† sanck Iudith den HEERE dit Liedeken, ende sprack:

+ A vers 1

† Exodi. 15.a.1. Iudic. 5.a.1.

2

Speelt den HEEre met Trommelen.

Ende clinct hem met^† Cymbalen.

^* Singhet hem een nieuwe Liet, weset vrolijck, ende roept sinen Naem aen.

† Psal. 150.a.5.

* Ps. 149.a.1. Esai. 42.b.10

3

De HEERE ist, die de oorlooghen stueren can, HEEre heet sinen Naem.

4

Hy strijdet voor zijn volc, dat hi ons verlosse van alle onse Vianden.

5

Assur quam van tgheberchte wt den Noorden, met eender grooter macht.

Sijn menichte^† bedecte de wateren, ende sine Peerden bedecten tlant.

† Iudith. 7.c.10

6

Hy dreychde mijn Lant te verbernen, ende mijne Ionghe gesellen te verworgen,

[p. 101v]

de kinderen ende maechden wech te voeren.

7

⁺ Maer de HEEre de Almachtighe God heeft hem ghestraft,^† ende heeften in eens Wijfs handen ghegeuen.

+ B vers 7

† Iudit 13.b.10. Iudic. 4.d.21. 5.d.26.

8

Want gheen Man noch eenich Crijgher, en heeft hem verdaen, ende gheen Ruese en heeften aenghegrepen.

9

^† Maer Iudith die dochter Merari, heeften neder geleyt met haerder schoonheyt.

† Iudit. 10.d.15

10

^† Want sy leyde hare weduwen cleederen af, ende tooch hare schoone cleederen aen, ter vruechden den kinderen Israels.

† Iudit. 10.a.2.

11

Sy bestreeck haer met costelijck water, ende vlocht haer hayr om hem te bedrieghen.

12

Haer schoone schoenen verblinden hem, haer schoonheyt vinck zijn herte,^† Maer sy hieu hem den Cop af.

† Iudit. 13.b.10.

13

⁺ Dat hen de Persen ende Meden verwonderden, voor sulcken koenen daet.

+ C vers 13

14

Ende der Assiriers heyr^* huylde, doen mijne ellendighe voort quamen, die van dorst versmacht waren.

* Iudit. 14.c.11.

15

De Ionghen doorstaken de Assyriers, ende sloeghense inder vlucht, als kinderen.

16

Sy zijn vernielt vanden heyre des HEEREN mijns Godts.

17

^† Laet ons singhen een nieuwe Liet, den HEEre onsen Gode.

† Psa. 149.a.1. Esai. 42.b.10.

18

HEEre Godt, ghy zijt die machtige Godt, die groote daet doet,^* Ende niemant en can v wederstaen.

* 2.Hest. 2.a.4.

19

V moet alle dinck dienen,^† want soo wat ghy spreect, dat moet gheschieden.

† Genes. 1.a.3. Psal. 33.b.9.

20

Als ghy eenen eenen moet gheeft, dat moet voort gaen, ende uwen woorde en can niemant wederstant doen.

21

^† De Berghen moeten beuen^* ende de steenrootsen smelten, ghelijck wasch voor v.

† Psal. 18.a.8.

* Iudic. 5.a.4. Esai. 64.c.14

22

^‡ Maer die v vreesen, dien bewijst ghy groote ghenade.

‡ Mal. 4.a.2.

23

Want alle dat offer ende vette is veel te cleyn voor v. Maer den HEERE vreesen, dat is seer groot.

24

Wee den Heydenen die mijn volck veruolghen.^* Want de Almachtighe HEEre oordeeltse, ende besoectse ter tijt der wraken.

* Deut. 32.e.35.

25

^‡ Hy sal haer lijf plagen met vyer ende Wormen, Ende sy sullen branden ende^* huylen inder eewicheyt.

‡ Esaie. 66.d.24. Mar. 9.e.47.

* Mat. 13.f.50 22.b.13. 24.d.51. 25.c.30.

26

⁺ Na sulcker ouerwinninghe trock alle tvolck van Bethulia na Ierusalem, om den HEEre te aenbidden, ende reynichden hen, ende offerden Brantoffer, ende so wat sy beloeft hadden.

+ D vers 26

27

Ende Iudith hinck alle wapenen Holofernis op inden Tempel, ende den voorhanc, die sy van zijnen bedde ghenomen hadde,^* dattet den HEEre verbannen zijn soude eewelijck.

* 2.Reg. 8.b.11.

28

Ende tvolck was vrolijck te Ierusalem, byden Heylichdom, met die Iudith drye maenden lanck, ende hielden den vyerdach der ouerwinninghe. Daer na trock een yegelijck weder na huys.

29

Ende Iudith quam oock weder te Be-thulia, ende wert hooch geeert int gantsche lant Israels.

30

Ende sy en nam gheenen man weder na haers yersten mans Manasses doot. Ende sy wert gantsch oudt, ende bleef in haers mans huys, tot dat sy hondert ende vijf Iaer out wert,

31

^* Ende hare Maerte Abra maecte sy gantsch vrij: Daer nae sterf sy te Bethulia, ende men begroefse by haren man Manasse.

* Exod. 21.a.2. Deut. 15.b.12. Iere. 34.b.8.

32

^† Ende tvolck droech rouwe ouer haer, seuen dagen lanck.

† Genes. 50.b.10.

33

Ende alle haer goet deylde sy wt, onder haers mans vrienden.

34

Ende dewijle dat sy leefde, ende daer toe langhe daer na, en dorste niemandt teghen Israel trecken.

35

^† Ende den dach deser ouerwinninge, wort vanden Hebreen voor een groot Feest, gehouden, ende van hen geuiert eewelijc.

† 2.Hest. 5.d.23

¶ Eynde des Boecx Iudith.