Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Het hooft van Holofernes wort ter mueren wtghesteken, die van

[p. 101r]

binnen der stadt oueruallen de Vianden die haer beleghen hadden.

1

⁺ DAer nae sprack Iudith tot allen volcke: Lieue broeders, hoort my, So haest als den dach aenbreect,^* soo hanghet den Cop ouer de mueren wt,

+ A vers 1

* 1.Reg. 31.c.10 1.mac. 7.f.47 2.mac. 15.f.35.

2

Ende neemt uwe wapenen, ende valt altesamen wt in eenen hoop, ende met groot ghecrijchs, Soo sullen die inder Schaerwacht vlieden, ende sullen dan haren Heere opwecken, totten slach.

3

Ende als de Hooftlieden tot Holofernis Tente comen sullen, ende dat lichaem daer sien inden bloede ligghen, soo sullen sy verschricken.

4

Ende als ghy merct, dat sy versaecht geworden zijn, ende de vlucht gheuen, soo volcht haest nae, wandt de HEEre heeftse onder uwe voeten ghegheuen.

5

⁺ Doen nv Achior sach, dat de Godt Israels, gheholpen hadde, verliet hy der Heydenen maniere, ende gheloofde aen Godt,^* ende liet hem besnijden,^† ende is onder Israel gherekent gheworden, hy ende alle sine nacomelinghen, tot op desen dach.

+ B vers 5

* Gene. 17.b.10

† Iosu. 6.d.25

6

Ende doen den dach aenbrack, hinghen si den Cop ouer de mueren wt, ende namen haer gheweer, ende vielen wt in eenen hoop, ende met groot ghecrijsch.

7

Ende doen de nederste Schaerwacht sulcx sach, liepen si nae Holofernis Tente. Ende die daer in waren, richteden een bulderen aen voor zijnder Camer, daer hy af soude wacker worden, want men en wist niet aencloppen, oft in des Vorsts te Assyrien Camer gaen.

8

Maer doen de Hooftlieden der Assyriers quamen, seyden si den Camerdienaren: Gaeter in, ende wect hem op,^† wandt de Muysen zijn wt gheloopen, wt hare holen, ende zijn coen geworden, dat si ons nv aengrijpen derren.

† 1.Re. 14.b.11.

9

⁺ Doen ghinc Bagao daer in, ende tradt voor den voorhanck, ende clapte met de handen, want hy meynde dat hy by Iudith sliep, ende luysterde, oft hi hem roepen wilde.

+ C vers 9

10

Maer doen hy niet en vernam, hief hy den voorhanc op, doen sach hy tlichaem sonder den Cop, in zijnen bloede opter Aerden ligghen.

11

Doen^† creet ende huylde hy luyde, ende verschuerde sine cleederen, Ende sach in Iudiths Camer, ende doen hijse niet en vant, liep hy wt tottet Crijchsvolck, ende sprac:

† Iudit. 16.c.14

12

Een eenich Hebreeusch Wijf, heeft dat gantsche huys NebucadNezars van Assyrien, tot spot ende schimp ghemaect, voor de gheheele werelt.

13

Want Holofernes leyt daer doot opter Aerden, ende den Cop is hem afghehouwen.

14

Doen de Hooftlieden van Assyrien dat hoorden, verschuerden si haer cleederen, ende verschricten wter maten seer, ende daer wert een groot moortghecrijsch onder hen.