Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ Hoe Iudith Holoferni zijn hooft af sloech.

1

⁺ DOent nv gantsch laet wert, gingen sine dienaers wech in hare Tenten, ende si waren altemael droncken.

+ A vers 1

2

Ende Bagao maecte Holofernis Camer toe, ende ghinck van daer.

3

Ende Iudith bleef alleen by hem inde Camer.

4

Doen nv Holofernes int bedde lach,^* was droncken ende sliep,

* 3.Esd. 3.c.18. Prou. 20.a.1. Genes. 9.d.21. 1.Reg. 25.f.36 3.Reg. 20.c.16

5

Seyde Iudith tot haer Maerte, si soude daer buyten de wacht houden voor de Camer.

6

Ende Iudith tradt voor dat bedde, ende badt heymelijc met tranen ende seyde:

7

HEEre Godt Israels, sterct my, ende helpt my ghenadelijck volbrenghen, dat ick met gantsch betrouwen op v, voorghenomen heb, dat ghy uwe stadt Ierusalem verhoocht, ghelijck ghy belooft hebt.

8

Na sulcken ghebet, tradt si totter Pileernen bouen aent bedde,

9

Ende langde dat sweert af, dat daer aen hinc, ende troct wt, ende greep hem byden hayre, ende sprac weder: HEERE Godt, sterct my in deser vren.

10

⁺ Ende si hieu hem tweemael inden hals met alder macht,^† daer nae sneedt si hem den Cop af, wentelde het Lichaem wten bedde, ende nam de Deken met haer.

+ B vers 10

† 1.Reg. 17.g.51 1.mac. 7.f.47

11

Daer nae ghinck si wt, ende dede dat hooft Holofernis haerder Maerten, ende hietet in eenen sack steken.

12

Ende si ginghen met malcanderen wt nae haerder ghewoonheydt recht als wilden sy gaen bidden, door den legher, ende ghinghen rontsom door dat dal, op dat si heymelijc aen de poorte der stadt quamen.

13

Ende Iudith riep de Wachters: Doet de poorte op, wandt Godt is met ons, die heeft Israel de ouerwinninghe ghegheuen.

14

Doen nv de wachters haer stemme hoorden, ontboden si terstont de Outsten der stadt.

15

Die quamen alle tot haer, want si hadden alreede daer aen^† versaecht dat si niet weder comen en soude.

† Ghetwijffelt.

16

Ende si ontstaken Fackelen, ende ghingen rontsom haer, tot dat si op een Pleyne quam, Ende si hietse stille zijn, ende toehooren, ende sprack aldus:

17

⁺ Danct den HEEre onsen Gode,^† die niet en verlaet de ghene, die op hem betrouwen, ende heeft ons barmherticheyt bewesen, door my sine Maerte,

+ C vers 17

† Ecclesi. 2.b.12

18

Ghelijck hy den huyse Israels toegeseyt heeft, ende heeft in deser nacht, den Viant zijns volcx, door mijne hant verdaen.

19

Ende si trock dat hooft Holofernis wt,^† ende toondet hen, ende seyde: Siet, dit is dat Hooft Holofernis, des Velthooftmans der Assyriers. Ende siet, daer is de Deken daer hy onder lach, doen hy droncken was,

† 2.mac. 15.e.32.

20

Daer heeft hem de HEEre onse God, door eens Wijfs hant, verdaen. Soo warachtich als de HEEre leeft, heeft hy my door sinen Enghel bewaert, dat ick niet en ben veronreynicht gheworden, dewijle dat ick wt geweest ben, ende heeft my sonder sonde weder ghebracht, met grooter vruechden ende ouerwinninghen.^† Daerom dancket hem alle, wandt hy is goedertieren, ende helpt altoos.

† Psal. 106.a.1. 107.a.1. 108.a.1.

21

⁺ Ende si dancten alle den HEEre, ende seyden tot haer: Ghelouet sy de HEERE, die door v, onse Vianden heden te schanden ghemaect heeft.

+ D vers 21

22

Ende Osias de Vorst des volcx Israels seyde tot haer:^† Gheseghent zijt ghy, Dochter, vanden HEEre der Alderhoochsten Godt, bouen alle Wijuen op Aerden.

† Luce. 1.c.24.

23

Ende ghelouet sy de HEEre,^* die Hemel ende Aerde gheschapen heeft, die v gheluck ghegeuen heeft, den Hooftman onser Vianden te dooden. Ende heeft uwen Naem soo heerlijck ghemaect, dat v alle tijt prijsen sullen, alle, die des HEEren werck achten,

* Genes. 1.a.1. Psa. 146.a.6 Acto. 14.c.14 Apoc. 14.b.7.

24

Daerom dat ghy uwe leuen niet ghespaert en hebt, inder droeffenissen ende noot ws Volcx,

25

Maer hebtet verlost, voor den HEEre onsen Godt, Ende alle tvolck seyde, Amen, Amen.

26

⁺ Daer na ontbootmen Achior, tot dien seyde Iudith:

+ E vers 26

27

De Godt Israels, dien ghy ghepresen hebt, dat hy hem aen zijne Vianden wreken can, heeft in deser nacht, der Godloosen hooft vernielt, door mijne hant.

28

Ende dat ghijt siet, so is hier den Cop Holofernis, die den Godt Israels hoomoedelijck ghelastert heeft, ende v den doot ghedreycht, doen hy seyde:

29

^† Als dat volck Israels gheuanghen werde, so wilde hi v met hen laten doorsteken.

† Iudith. 6.a.3.

30

Ende doen Achior Holofernis Cop sach, ontsettede hy hem dat hy gheheel versterf.

31

Daer nae doen hy weder tot hem seluen quam,^* viel hy tot hare voeten, ende seyde:

* Dani. 2.g.46 Acto. 10.c.25.

32

Gheseghent zijt ghy van uwen Gode, in allen Hutten Iacobs. Want de Godt Israels, sal aen v gepresen worden, by alle volcken, die uwen naem hooren sullen.