Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ De Hooftman Holofernes beueelt datmen Iudith in grooter eeren ende weerden houden soude den gheheelen Legher duere, ende hy gheeft haer vrijheyt om haer ghebet te doen, nae haerder ghewoonte dach ende nacht te gaen.

1

⁺ DOen liet hijse in de Schatcamer brengen, dat si daer blijuen soude, ende beual datmense van zijnder Tafelen spijsighen soude.

+ A vers 1

2

Maer Iudith antwoorde, ende seyde:^† Ick en derf noch niet eten van uwer spijsen, op dat ick my niet en besondighe,

† Gene. 43.f.32 Tobie. 1.b.11. Danie. 1.b.8.

3

Maer ick heb een weynich met my ghenomen, daer wil ick af eten.

4

Doen seyde Holofernes selue: Als dat op is, dat ghy met v gebracht hebt, van waer sullen wy v dan wat weder beschicken?

5

Iudith antwoorde: Mijn Heere, soo ghewisselijc als ghy leeft, eer uwe Maerte dat al verteren sal, soo sal Godt door my wtrichten, soo wat hy inden sin heeft.

6

Ende doense de knechten inde Camer brenghen wouden, ghelijck hy beuolen hadde, badt si, datmen haer oorlofde, des Auonts ende Morgens wt te gaen, ende haer ghebet te doen totten HEERE.

7

⁺ Doen beual Holofernes sinen Camerdienaren, datmense drie daghen lanck, soude vrij wt ende in laten gaen, om haer ghebet te doen tot Godt.

+ B vers 7

8

Ende des Auonts ghinc si wt, in dat dal voor Bethulia, ende wiesch haer int water.

9

Daer nae badt sy totten HEERE, den Godt Israels, dat hy haer gheluck gaue, zijn volc te verlossen, Ende ghinck weder inde Tente, ende hielt haer reyn, ende en adt niet tot aenden Auont.

10

⁺ Opten vierden dach, maeckte Holofernes, sinen naesten dienaren alleene, een Auontmael, ende seyde tot Bagao sinen Camerlinck. Gaet henen, ende becout dat Hebreeusche Wijf, dat si haer niet en weyghere tot my te comen.

+ C vers 10

11

Want het is een scande byden Assyriers, dat sulc

[p. 100v]

een Wijf soude onbeslapen van ons comen, ende eenen man beghect hebben.

12

Doen quam Bagao tot Iudith, ende seyde: Schoon Wijf en wilt v niet weygheren, tot mijnen Heer ter eeren te comen, ende met hem eten ende drincken ende vrolijck zijn.

13

Doen seyde Iudith: Hoe derf ict mijnen Heere ontseggen? Al wat hem lief is, dat wil ic van herten geerne doen, al mijn leefdaghe.

14

⁺ Ende si stont op ende vercierde haer, ende ghinc in voor hem, ende stont voor hem.

+ D vers 14

15

Doen ontspranck Holoferni zijn herte,^† want hy was ontsteken met vierigher liefden tegen haer, ende seyde tot haer:

† Ecclesi. 9.a.9. Susan. b.8.

16

Set v neder, drinckt ende weest vrolijck, want ghy hebt ghenade by my gheuonden. Ende Iudith antwoorde:

17

Ia Heere, ick wil vrolijck zijn, want ick en ben mijn leefdaghe, soo hooch niet gheeert gheworden.

18

Ende si adt ende dranck voor hem, wat haer Maerte bereydet hadde.

19

Ende Holofernes was vrolijck met haer, ende dranck soo veel als hy dus niet en plach te drincken.