Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ Holofernes vraecht van haer, wt wat oorsake si wt ghecomen is, ende als zijt hem vertreckt, so beuielt hem wel.

1

⁺ ENde Holofernes seyde tot haer: Hebt eenen goeden moet, ende en vreest niet, want ick en hebbe noyt eenen mensche leedt ghedaen, die hem onder den Coninck NebucadNezar ghegeuen heeft.

+ A vers 1

2

Ende en hadde my v volck niet veracht, soo en hadde ick noyt een Spiesse teghen haer opgheheuen. Nv segt op, waerom dat ghi van hen gheweken zijt, ende tot my ghecomen?

3

Iudith antwoorde ende seyde: Wilt uwe Maerte ghenadelijc hooren. Ist dat ghy doen sult, ghelijck v uwe Maerte segghen sal, so sal v de HEEre gheluck ende ouerwinninghe geuen.

4

Godt geue NebucadNezar gheluck ende Heyl, den Coninck des gantschen Lants, die v wtghesonden heeft, om alle ongehoorsamen te straffen. Want ghy cont hem onderdanich maken, niet alleen de Lieden, maer oock alle dieren opten Lande.

5

Want uwe vernuft ende wijsheyt is vermaert in de gantsche werelt. Ende alleman weet, dat ghi de geweldichste Vorst zijt int gantsche Conincrijck, ende v goet Regiment wort ouer al ghepresen.

6

^+* So weten wy oock wat Achior gesproken heeft, ende hoe ghy met hem daer teghen gedaen hebt.

+ B vers 6

* Iudith. 5.a.5.

7

Want onse God is soo toornich ouer onse sonden, dat hy door sine Propheten heeft laten vercondighen, hy wil dat volc straffen, om haerder sonden wille.

8

De wijle nv dat volck Israels weet, dat si haren Godt vertoornt hebben, soo zijn si voor v verschrict.

9

Daer toe lijden si grooten honger, ende moeten van dorst versmachten.

10

Ende hebben nv voorgenomen, haer Vee te slaen, op dat si des seluen bloet drincken, ende dat heylighe offer te eten, aen Coren, Wijn ende Olie, dat hen Godt verboden heeft, dat zijt oock niet aenroeren en souden.

11

Daerom ist ghewis, dat sy vergaen moeten, de wijle si sulcks doen.⁺ Ende de wijle ick dat weet,^* ben ick van hen geuloden, ende de HEEre heeft my tot v gesonden, dat ic v sulcx soude bootschappen.

+ C vers 11

* Iudit. 10.c.11.

12

Wandt hoe wel ick tot v ghecomen ben, so en ben ick nochtans daerom van Godt niet afgeuallen, maer wil mijnen Gode noch dienen by v.

13

Ende uwe Maerte sal wtgaen, ende Godt aenbeden, die sal my openbaren, wanneer hy hen haer loon gheuen wil voor hare sonde.

14

Soo wil ick dan comen, ende wilt v bootschappen, ende v midden door Ierusalem leyden, dat ghy alle dat volc Israels hebt, ghelijck als Schapen die gheenen Herder en hebben, Ende v en sal niet eenen hont derren aen bassen,

15

Want dit heeft my God geopenbaert, de wijle hy op hen toornich is, ende heeft my ghesonden op dat ict v bootschappe.

16

⁺ Dese Redene behaechde Holoferni ende sinen knechten wel, ende si verwonderden hen haerder wijsheydt, ende seyden onder malcanderen:

+ D vers 16

17

Des Wijfs ghelijck en is niet op Aerden, van scoonheyt ende wijsheyt.

18

Ende Holofernes seyde tot haer: Dat heeft God also geschict, dat hy v hier ghesonden heeft, eer dat het volck in mijn hant quame.

19

^† Indien nv v Godt sulcx wtrichten sal, ghelijck ghy gheseyt hebt, soo sal hy oock mijn Godt zijn, ende ghy sult groot worden byden Coninck NebucadNezar, ende dijnen naem sal ghepresen worden, int gantsche Conincrijck.

† Ruth. 1.c.16.