Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ Daer na bereyt si haer costelijc toe, si neemt haer maghet met haer, ende trect snachts ter poorten wt, inden Legher van Holofernis.

1

⁺ DOen si nv wtgebeden hadde, stont si op, ende riep haer Maerte Abra, ende ginc neder int huys,^† leyde den sack af,

+ A vers 1

† 2.Hest. 4.a.1

2

Ende tooch haer Weduwe cleederen wt, ende wiesch haer, ende salfde haer met costelic water, ende vlochte haer hayr, ende settede een Huyue op, ende tooch haer schoone cleederen aen,

3

Ende vercierde haer met Spanghen ende Armspanselen, ende tooch alle haer vercieringhen aen.

4

Ende de HEEre gaf haer genade, dat si lieffelijck aen te sien was, wandt si en verchierde haer niet wt dertelheyt, maer Godt te loue.

5

Ende si dede haerder Maerten een ghepeckte Wijnfles vol Wijns, ende een Cruyck met Olie, ende eenen sack, daer sy Vijghen, Meel ende broot in hadde, dat si eten mochte, ende si ghinck henen.

6

^+† Ende aen de poorte vant si Osiam ende de Outsten, die haer verwachteden, ghelijct verlaten was.

+ B vers 6

† Iudit. 8.e.29.

7

Ende si verwonderden hen, dat si so schoone was, Nochtans en vraechden si niet, wat si inden sin hadde, maer lietense wt, ende seyden:

8

De Godt onser Vaderen geue v ghenade, ende late v voornemen wel gelucken, dat hem Israel uwer verhueghe, ende uwen Naem gherekent worde onder de Heyligen. Ende alle die daer waren, seyden, Amen, Amen.

9

Maer Iudith bat, ende ghinc voort met hare Maerte Abra.

10

⁺ Ende doen si smorghens vroech den Berch af ghinck, ontmoeteden haer de Wachters der Assyriers, ende liepen haer aen, ende vraechden haer, van waer sy quame, ende waer si henen wilde?

+ C vers 10

11

Ende si antwoorde: Ick ben een Hebreeus Wijf,^† ende ben van hen gheuloden, want ic wetet, dat si v inde handen comen sullen, Daerom dat si v veracht hebben, ende niet en wilden ghenade soecken, ende hen willichlijcken gheuen.

† Iudith. 11.c.11

12

Daerom hebbe ick voor my genomen, byden Vorst Holofernis te comen, dat ick hem hare heymelijcheyt openbare, ende segge hem, hoe hijse lichtelijcken ouerwinnen mach, dat hy niet eenen man verliesen en derf.

13

⁺ De wijle dat si soo sprack, saghen syse aen, ende verwonderden hen gantsch seer, dat si soo schoon was, ende seyden:

+ D vers 13

14

Dat mocht v helpen, dat ghijt so goet meynt, ende tot onsen Heere gaen wilt, wandt als ghy voor hem coemt, so sal hy v ghenadich zijn, ende ghy sult hem van herten wel behaghen.

15

Ende si brachtense in Holofernis Tente, ende spraken hem van haer. Ende doen si voor hem quam,^* werdt hy soo haest ontsteken teghen haer. Ende sine dienaers seyden onder malcanderen:

* Ecclesi. 9.a.9. Iudit. 16.b.9.

16

Dat Hebreeusche volc en is trouwen niet te verachten, de wijle dattet schoone Wijuen heeft. En soudemen om sulcker schoone

[p. 100r]

Wijuen wille niet crijgen?

17

^† Doen nv Iudith Holofernem sach sitten onder zijn Tapete, dat schoon ghewrocht was, met Purpur ende gout, ende met Smaragden, ende veel edele steenen verciert, viel si voor hem neder, ende badt hem aen. Ende Holofernes hietse weder oprechten.

† 2.Hest. 4.a.3