Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

[p. 99v]

¶ Iudith gaet in haer heymelijcke Camer, ende roept Godt aen met een ootmoedich ghebet, dat hy zijn volck wilde behoeden.

1

⁺ DAer na ghinck Iudith in haer Camer, ende becleede haer met eenen sack,^† ende stroyde asschen op haer hooft, ende viel neder voor den HEEre, ende riep tot hem,

+ A vers 1

† 2. Hest. 3.a.2.

2

Ende seyde:^* HEEre God mijns Vaders Simeon,^† dien ghy dat sweert ghegheuen hebt, om de Heydenen te straffen, die de Maget onteert, ende te schanden gemaect hadden,

* Gen. 24.b.27

† Ge. 34.d.25

3

Ende hebt hare Wijuen ende dochteren gheuanghen, ende haer laten beroouen, door uwe knechten, die daer in uwen ijuer gheijuert hebben. Helpt my arme Weduwe, HEERE mijn Godt.

4

Want alle hulpe, die in voortijden, ende na oyt gheschiet is, die hebt ghy ghedaen, Ende soo wat ghy wilt, dat moet gheschieden.

5

Want als ghi helpen wilt, so en cant niet faelgeren, ende ghy weet hoe ghy de Vianden straffen sult.

6

Merct nv op der Assyriers heyr^† gelijck als ghy in voortijden, op der Egiptenaers heyr, saecht, doen si uwe knechten naiaechden met grooter macht, ende verlieten hen op hare Waghenen, Ruyteren, ende groot Crijchsvolck.

† Exo. 14.e.25.

7

Maer doen ghijse aensaecht, werden si versaecht, ende de diepte verrastese, ende dat water verdroncse.

8

⁺ Also gheschie oock nv desen, HEEre,^† die daer pochen op hare macht, Waghenen, Spiessen ende gheschut, ende en kennen v niet, ende en dencken niet, dat ghy HEERE onse Godt die ghene zijt,

+ B vers 8

† Psalm. 20.a.8 4.Re. 19.d.22 Iudith. 1.a.4

9

Ghy die den Crijch stuert van aenbeginne, ende heet met recht HEEre.

10

Strect uwen Arm wt ghelijck in voortijden, ende slaet de Vianden in stucken door uwe macht, dat sy vergaen door uwen toorne,

11

Die hen beroemen, si willen v Heylichdom verstooren, ende de Hutten ws Naems ontheyligen, ende met haren sweerde uwen Altaer omwerpen.

12

Straft haren hoomoet door haer eygen sweert, dat hy met zijn eyghen ooghen gheuanghen worde, als hy my aensiet, ende door mijne vriendelijcke woorden, bedroghen worde.

13

⁺ Geeft my eenen moet dat ic my voor hem, ende voor sine macht niet en ontsette, Mer dat ic hem ter neder stooten mach.

+ C vers 13

14

Dat sal ws Naems eere zijn,^† dat hem een Wijf neder geleyt heeft.

† Iudi. 4.d.21. 5.d.24.

15

^* Want ghy HEEre cont wel ouerwinninge geuen, sonder alle veelheyt,^‡ ende en hebt geenen lust aen de stercheyt des Peerts,^† v en hebben de hoouaerdigen, noch noyt behaget.

* 2.pa. 14.c.11 16.b.8. 20.d 22 Iudi. 7.a.7.

‡ ps. 147.b.10.

† Eccle. 10.a.9 Luce. 1.d.47.

16

Maer alle tijt heeft v wel behaget, der ellendigher ende ootmoediger ghebet.

17

O HEERE, een Godt des Hemels, Schepper der wateren, ende HEEre alder dinghen, verhoort mijn arme ellendighe ghebet,

18

Ick die alleen op uwe barmhertichheit betrouwe.^‡ Denct HEEre op v verbondt, ende gheeft my in, wat ick spreken ende dencken sal, ende gheeft mi geluck daer toe, op dat v huys blijue,

‡ Eccle. 36.a.8.

19

Ende alle Heydenen beuinden, dat ghy God zijt,^† ende geen ander, dan ghy alleen.

† Deut. 32.f.39.