Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Achior wort gheuangen, ende den Iootschen volcke ouer gheleuert, den welcken Achior de geheele ghelegentheyt vertelt, waer af tvolc beweghet zijnde, tot Gode den HEERE om hulpe roept.

1

⁺ DAer nae wert Holofernes ooc gram op Achior, ende seyde:^† Hoe derfdy ons propheteren, dat dat volck Israels van sinen God beschuttinge sal hebben?

+ A vers 1

† Iudith. 5.f.25

2

Maer als wyse nv slaen, ghelijc als eenen mensche, so sult ghy sien, datter gheen ander Godt en is, dan alleen NebucadNezar.

3

Ende^* dan sult ghy oock, door der Assyriers sweert, met haer doorsteken worden, ende gheheel Israel sal met v vergaen.

* Iudit. 13.e.29.

4

So sult ghy dan beuinden, dat NebucadNezar, een Heere der gantscher Werelt sy, als ghi met mijnen sweerde doorsteken wordt, ende ligt onder den verslaghenen Israels, ende moet steruen ende verderuen.

5

Maer meynt ghi dat dijne prophetie ghewis is, so en derft ghy niet verscricken, noch bleeck worden, Ghelijck alst haer gaen sal, soo salt v oock gaen.

6

Want ick wil v nv tot haer seynden, op dat ick v met haer straffe.

7

⁺ Doen beual Holofernes sinen knechten, dat si Achior grijpen souden, ende hem nae Bethulia voeren, in de handen der kinderen Israels. Ende de knechten Holofernis grepen hem.

+ B vers 7

8

Ende doen si ouer dat vlacke velt aen tgeberchte quamen, doen trocken de Schutters teghen haer wt.

9

Doen weken si op eene zijde aenden berghe, ende bonden Achior aen eenen boom, met handen ende voeten, ende stieten hem onderwaerts ende lieten hem alsoo hanghen, ende trocken weder tot haren Heere.

10

Maer de kinderen Israels, quamen nederwaerts van Bethulia tot hem, ende maecten hem los, ende brachten hem in te Bethulia, ende leydden hem onder tvolck, ende vraechden hem: Hoe dat toe ghegaen ware? Waerom hem de Assiriers ghehanghen hadden?

11

⁺ Ter seluer tijt waren de Ouerste inder stadt, Osias de sone Micha, vanden stamme Simeon ende Charmi, die oock Othoniel hiet. Voor dese Outste ende voor alle tvolck,^* seyde Achior, al wat hem

+ C vers 11

* Iudith. 5.b.5.

[p. 98v]

Holofernes geuraecht, ende wat hy gheantwoort hadde, ende dat hem Holofernes Lieden, om deser antwoort wille, hadden willen dooden.

12

Maer Holofernes had beuolen, datmen hem den kinderen Israels ouer soude leueren, op dat, als hi de kinderen Israels gheslaghen hadde, dat hy hem, te weten, Achior, dan oock wilde straffen ende verdoen, daerom dat hy gheseyt hadde: De^* Godt des Hemels sal hare Beschermer zijn.

* Iudith. 5.f.25

13

Doen Achior sulcx gheseyt had, viel alle tvolc op haer aensicht,^* ende baden den HEEre aen, weenden alle te samen, ende baden tot den HEEre ende seyden:

* 2.Mac. 13.c.12

14

^† HEEre Godt des Hemels ende der Aerden, siet aen haren hoomoet ende onse ellende, ende siet dijne Heyligen genadelijck aen, ende bewijst,^† dat ghy de gene niet en verlaet, die op v hopen, ende stoot ter neder,^* die op haer seluen ende hare macht pochen.

† Math. 11.d.25

† Eccle. 2.b.12.

* Psalm. 20.a.8 4.Re. 19.d.22

15

⁺ Alsoo weenden ende baden si den gantschen dach, ende troosteden Achior, ende seyden:

+ D vers 15

16

De God onser vaderen, diens macht ghy gepresen hebt, salt v also vergelden, dat si haren lust aen v niet en sien, Maer dat ghy siet, hoe si gheslagen ende vernielt worden.

17

Ende wanneer ons de HEERE onse Godt verlost, so si God met v onder ons. Ende wildy, soo suldy met alle den uwen, by ons woonen.

18

Doen nv dat volck weder van malcanderen ghinck, nam hem Osias met hem in zijn huys, ende maecte een groot Auontmael, ende badt tot hem alle Outste, ende leefden wel, nae dien si langhe gheuast hadden.

19

^† Daer na wert dat volc weder te samen geroepen, ende badt om hulpe, vanden Gode Israels, inde vergaderinghe, den gantschen nacht.

† Iohel. 2.c.15.