Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ De Ioden werden verschrickt, sorghende voor de stadt van Ierusalem ende den Tempel, si bereyden hen ten strijde, biddende Godt om hulpe.

1

⁺ DOen de kinderen Israels, die inden lande Iuda woonden, sulcx hoorden, vreesden si gheheel seer voor hem, ende beefden ende verschrickinge quam haer aen,

+ A vers 1

2

Want si sorchden, hy mochte der stadt Ierusalem, ende den Tempel des HEEren oock alsoo doen, ghelijc hi den anderen steden ende haren Afgoden huysen ghedaen had.

3

Daerom seynden si int gantse lant Samarien rontsom, tot aen Iericho, ende besetteden de vasticheden op de bergen, ende maecten mueren om hare vlecken, ende beschicten prouande totten Crijghe.

4

Ende de Priester Ioiakim screef tot alle de ghene, die tegen Esdrelom woonden, dat is, teghen den grooten velde by Dothaim, ende tot allen, daer de vianden mochten door comen,

5

⁺ Dat si de Clippen aen tgheberchte teghen Ierusalem, souden bewaren.

+ B vers 5

6

Ende de kinderen Israels deden, ghelijck hen Ioiakim des HEEren Priester beuolen hadde.

7

^† Ende alle tvolc riep met ernste tot den HEERE, ende si ende hare wijuen verootmoedichden haer met vasten ende bidden.

† Eccle. 35.c.27.

8

Ende de Priesters trocken sacken aen, ende de kinderen laghen voor den Tempel des HEEREN,

9

Ende des HEEren Altaer bedectemen met eenen sack. Ende si riepen tot den HEERE, den Godt Israels eendrachtelijcken, dat hare kinderen ende wijuen niet en mochten wech gheuoert,

10

Haer steden niet verdestrueert, hare heylichdom niet veronreynicht, ende si vanden Heydenen niet ghescheynt worden.

11

⁺ Ende Ioiakim de hooge Priester des HEEren, ginc rontsom, vermaende dat gantsche volck Israels, ende sprac:

+ C vers 11

12

Ghy sult ymmers weten, dat de HEEre uwe ghebet verhooren sal, in dien ghy niet af en laet, met vasten ende bidden voor den HEEre.

13

^† Ghedenct aen Mosen den dienaer des HEEREN, die niet metten sweerde, maer met heyligen gebede, den Amalek sloech,^* die hem op zijn cracht ende macht, op zijn heyr, schilt, waghens ende Ruyters, verliet.

† Exod. 17.c.11.

* Psalm 20.a.8

14

Also salt ooc gaen allen vianden Israels, in dien ghy v also betert, ghelijck ghy begonnen hebt.

15

Na sulcker vermaninge, baden si den HEEre, ende bleuen voor den HEEre,

16

Also, dat oock de Priesters in sacken ghinghen, ende asschen op den hoofde hadden, ende alsoo Brandtofferen den HEEre deden. Ende baden alle den HEERE van gheheelder herten, dat hy zijn volck Israel besoecken wilde.