Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Vele Coninghen, Princen, ende Landen, wt vreese van hem gheuen haer op, ende worden hem onderdanich.

1

⁺ DOen seynden de Coninghen ende Vorsten van Syrien, Mesopotamien, Syrien Sobal, Libien ende Cilicien, hare Legaten, wt alle steden ende Landen, die quamen tot Holofernem, ende seyden:

+ A vers 1

2

Keert dijnen toorne van ons, want het is beter, dat wy NebucadNezar den grooten Coninck dienen, ende v ghehoorsaem zijn, ende leuendich blijuen,

[p. 97v]

dan dat wy vergaen, ende winnen doch effen wel niet:

3

Alle onse steden, goeden, berghen ende hueuelen, ackeren, ossen, schapen, geyten, peerden ende kemelen, ende wat wy slechs hebben, daer toe ooc onse ghesin, is altemael uwe, doet daer mede wat ghy wilt.

4

Iae oock wy met onse kinderen, zijn uwe knechten, Coemt tot ons, ende weest onse ghenadige Heere, ende bruycket onses diensts, alsoot v slechs behaecht.

5

⁺ Doen tooch Holofernes vanden gheberchte af metten gantsen Crijchsvolcke, ende nam de vaste steden ende dat geheele Lant in, ende las daer knechten wt dat beste volck, dat hy onder hen vant.

+ B vers 5

6

Daer af verschricten alle Landen soo seer, dat de Regenten ende vernaemste wt alle steden, metten volcke,^† hem te ghemoet quamen, ende namen hem aen met cransen, keersen, reyen, trommelen ende pijpen.

† Iudith. 5.a.4

7

Ende en conden nochtans met sulcker eere, geen ghenade vercrijgen, want hy brack hare steden in stucken, ende hieu hare Bosschen om.

8

Want NebucadNezar de Coninck had hem gheboden, dat hy alle goden in de landen vernielen soude, op dat alle volcken, die Holofernes bedwinghen soude, hem alleen voor eenen Godt presen.

9

Doen hy nv Syrien Sobal, Apamean, ende Mesopotamien door ghetogen hadde, quam hy totten Edomiten int lant Gabaa, ende nam hare Steden in, ende lach daer dertich daghen lanck, daer en tusschen ontboot hy zijn Crijchsvolck altemael te samen.