Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Van de onuersadighe begheerten NebucadNezars, om te regeren ende de Landen in te nemen.

1

⁺ INden derthiensten Iare NebucadNezars des Conincx, den tweentwintichsten dach der eerster maent, wert gheraetslaget inden huyse NebucadNezars des Conincks van Assyrien, dat hy hem wilde wreken.

+ A vers 1

2

Ende hy ontboot, alle sine Raetsheeren, Vorsten ende Hooftlieden tot hem,

3

Ende Raetslaechde heymelijcken met hen, ende hielt hen voor, hoe hi dachte, alle dese Landen onder zijn Rijck te brenghen.

4

Doen sulcks hen alle wel behaechde, ontboot de Coninc NebucadNezar, Holofernem sinen velthooftman tot hem, ende sprack:

5

Trect wt teghen alle Rijcken, die teghent Westen liggen, ende sonderlinghe teghen de ghene, die mijn ghebot veracht hebben.

6

^* Ghy en sult gheen Rijck verschoonen, ende alle vaste steden sult ghy my onderdanich maken.

* Ezech. 9.b.5.

7

⁺ Doen ontboot Holofernes de Hooftlieden, ende Ouersten des Assyrischen Crijchsvolcks tot hem, ende rustede dat volck totten Crijch,

+ B vers 7

8

Ghelijck hem de Coninck gheboden had,^† hondert ende twintich duysent te voete, ende twaelf duysent Schutters te peerde.

† Iudith. 7.a.1.

9

Ende liet alle zijn Crijchsvolck, voor hem henen trecken met ontellijcke Kemelen, groote prouande,

10

Daer toe met ossen ende schapen sonder ghetal, voor zijn volck. Ende liet wt gants Sirien coorn toeuoeren, in zijn heyr, maer gout ende ghelt nam hy wter maten veel met hem, wt des Conincx Camer.

11

Ende toch alsoo voort metten gheheelen heyre, met waghenen, Ruyteren ende Schutters, welcke den Aertbodem bedecten, ghelijc als Sprinchanen.

12

⁺ Doen hy nv ouer de Palen des Assyrischen lants ghetoghen was, quam hi aen dat groote geberchte Ange, ter slincker zijden Cilicien,

+ C vers 12

13

Ende nam alle hare vlecken ende vaste steden in. Ende verdestrueerde Melothi een beroemde stadt, ende beroofde alle Lieden in Tharsis, ende de kinderen Ismaels, die daer woonden teghen de woestijnen, ende teghen tsuyden des lants Chellon.

14

Hy tooch ooc ouer de^† Phrat, ende quam in Mesopotamien, ende verdestrueerde alle hooghe steden, die hi vant, van der beke^* Mambre aen, tot aen de zee,

† Genes. 2.c.14

* Genes. 13.d.18

15

Ende nam daer de palen in, van Cilicien aen, tot aen de palen Hoppe, die tegen tsuyden liggen.

16

Ende voerde ooc wech de kinderen Midian, ende roofde alle haer goet. Ende sloech alle die hem wederstonden, metter scherpten des sweerts.

17

Daer nae reysde hy af, int lant Damasco, inden oogst,^† ende verbrande alle haer Coorn,^* ende liet neder houwen alle Boomen ende Wijnberghen,^‡ ende dat gheheele Lant was beureest voor hem.

† Iudit. 15.b.5.

* Deu. 20.c.19

‡ Iosue. 2.b.9 5.a.1.