Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Van de toecoemst Christi, ende des geens die hem den wech voor bereyt heeft, Van de verwerpinghe des ouden Leuitischen Priesterdoms.

1

⁺ SIet, ic wil mijnen^† Enghel seynden, die voor my den wech bereyden sal. Ende de HEERE dien ghy soect, sal haest tot sinen Tempel comen, Ende de Enghel des verbonts,^* dien ghy begheert. Siet, Hi coemt, spreect de HEEre Sebaoth,

+ A vers 1

† Matt. 11.b.10 Marc. 1.a.2. Luce. 7.c.27.

* Genes. 4.a.1. 5.d.29. Esa. 64.c.14

2

Maer wie sal den dach zijnder toecoemst mogen verdragen? Ende wie sal staende blijuen, als hy verschijnen sal? Wandt hy is ghelijck dat vier eens goutsmits, ende ghelijck de seep der wasschers.

3

Hy sal sitten ende smelten, ende dat siluer reynigen.^† Hy sal de kinderen Leui reynighen ende louteren, ghelijck als siluer ende gout. Dan sullen si den HEERE Spijsoffer brenghen in gherechticheyt,

† Sacha. 13.b.8 Sapi. 3.a.6. 4.Esd. 16.g.74. 1.Petri. 1.b.7

4

^* Ende dat Spijsoffer Iuda ende Ierusalems sal den HEEre wel behaghen, ghelijck te voren ende voor lange Iaren.

* Rom. 12.a.1 1.Petri. 2.a.5

5

Ende ick wil tot v comen, ende v straffen, ende wil een snel ghetuyghe zijn, teghen de^† Toouenaers,^* Ouerspeelders, ende^‡ Meyneedighe, ende teghen de ghene die ghewelt ende onrecht doen, den dach huerlinghen,^* Weduwen ende Weesen, ende de vreemdelinghen verdrucken, ende my niet en vreesen, seyt de HEEre Sebaoth.

† Deut. 18.b.10

* exo. 20.c.14.

‡ Iere. 7.a.9. 1.Tim. 1.b.10.

* Esaie. 1.c.23 Ierem. 5.d.26 Ezech. 22.a.7.

6

⁺ Want ic ben de HEEre,^† die niet en^‡ liecht, Ende het en sal met v kinderen Iacobs niet gheheel wt zijn.

+ B vers 6

† Rom. 3.a.4 Titum. 1.a.2.

‡ Verandert.

7

Ghy zijt van uwer Vooruaders tijt aen, altijt af gheweken van mijne geboden, ende en hebtse niet gehouden.^† Daeromme bekeert v nv tot my, Soo wil ick my ooc tot v bekeeren, spreect de HEEre Sebaoth.

† Sacha. 1.a.2. Iere. 15.d.19. 18.a.11. 25.a.5. 35.c.15. Ezech. 18.e.30

8

Ende ghy segt: Waer in sullen wy ons bekeeren? Ist ooc recht dat een mensche God bedriecht, ghelijck ghy my bedriecht? Ende ghy segt: Waer mede bedrieghen wy v? Met de^† thienden ende Hefofferen.

† Leuit. 27.d.30

9

Daerom zijt ghy ooc veruloect,^* dat v alle dinc onder de handen verdwijnt, Want ghy bedriecht my altesamen.

* Hagge. 1.a.6.

10

^* Maer brengt de thienden geheel in mijn Coornhuys, op dat in mijnen huyse spijse sy, Ende proeft mi hier in, seyt de HEEre Sebaoth, oft ic v niet des Hemels vensteren op doen en sal, ende der segheninghen ghenoech af gieten en sal.

* Prou. 3.b.9.

11

Ende ick wil voor v de Verslinder berispen, dat hy v de vrucht op den velde niet verderuen en sal, Ende dat den wijnstock op de Acker v niet onuruchtbaer en sy, spreect de HEEre Sebaoth,

12

Alsoo dat v alle Heydenen salich prijsen sullen. Wandt ghy sult een costelijck Lant zijn, seyt de HEERE Sebaoth.

13

^+* Ghy spreect hart teghen my, seyt de HEEre. Ende ghy segt: Wat spreken wy teghen v?

+ C vers 13

* Esaie. 58.a.2.

14

Daer mede, dat ghy segt: Het is te vergeefs, datmen Gode dient, Ende wat batet, dat wy zijn gebot houden, ende een strenghe leuen voor den HEERE Sebaoth leyden?

15

Daerom prijsen wy de Verachters.^† Wandt de godtloosen nemen toe, Sy tempteren Godt, ende het vergaet haer al wel.

† Iob. 21.a.7. Ierem. 12.a.1. Psal. 73.a.2. Abac. 1.c.13.

16

Mer de^* Godvresende, troosten haer onder malcanderen alsoo: De HEERE mercket, ende hooret.^‡ Ende daer is een ghedencsedel voor hem ghescreuen, voor den ghenen, die den HEEre vreesen, ende op sinen Name dencken.

* 2.Cor. 1.a.4

‡ Eccl. 15.c.24 Psalm. 33.c.18 34.b.16.

17

Sy sullen (spreect de HEERE Sebaoth) op dien dach, dien ick maken wil,^* mijn eyghendom zijn. Ende ick wil haer sparen, ghelijck een man sinen sone spaert, die hem dient.

* Exod. 19.a.5. Deut. 14.a.2. 1.Petri. 2.b.9

18

Ende ghy sult daer teghen wederomme sien,^† watter voor een onderscheyt sy tusschen den gherechten ende godloosen, ende tusschen den ghenen, die Gode dient, ende den genen, die hem niet en dient.

† 2.Cor. 6.b.14