Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Van de Macht des toecomenden Richters, Ende vanden veruaerlijcken dach des laetsten oordeels, voor de godtloosen, Ende van de predicatie des geestelijcken Helie, voor den laetsten dach.

1

⁺ VVant siet, daer coemt eenen Dach,^† die daer branden sal, ghelijc eenen Ouen. Dan sullen alle verachters ende godtloosen^* stroo zijn, Ende den toecomenden dach salse aensteken, seyt de HEEre Sebaoth, Ende en sal hen noch wortel, noch tack laten.

+ A vers 1

† Esaie. 66.c.15 2.Tessa. 1.b.8. 2.Pet. 3.b.10.

* esa. 47.c.14 Eccle. 16.a.7. 21.b.10.

2

Maer v,^‡ die mijnen Name vreest,^* sal de Sonne der gerechticheyt opgaen, ende Heyl onder der seluer vlueghelen.^† Ende ghy sult wt ende in gaen, ende toenemen ghelijck de mestcaluers.

‡ Mich. 6.b.9

* Sap. 5.a.6.

† Ioan. 10.a.9.

3

^* Ghy sult de Godtloosen vertreden, Want si sullen^† Asschen onder uwe voeten worden, op den dach, dien ick maken wil, spreect de HEERE Sebaoth.

* Psal. 49.b.15

† Psal. 1.b.5.

4

Ghedenckt des Wets Mosy mijns knechts. de^† welcke ick hem beuolen hebbe,^* opten Berch Horeb, aen dat geheele Israel, metten gheboden ende Rechten.

† Deut. 4. 5. 9. 4.esd. 14.a.5

* Exod. 3.a.1.

5

Siet, ic wil v seynden den Propheet^† Heliam,^* eer den grooten ende verschrickelijcken dach des HEEREN coemt.

† Mat. 11.b.14 17.b.10. Luce. 1.a.13.

* Iohel. 2.a.1.f.31. Soph. 1.c.14

6

^‡ Die sal dat herte der Vaderen bekeeren totten kinderen, Ende dat herte der kinderen, tot haren Vaderen. Op dat ick niet en come, ende dat Aertrijcke met den Ban sla.

‡ Luce. 1.a.13.

Eynde des Propheten Maleachi.