Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Vande straffinghe der Ioden, ende de oeffeninghe Ierusalems der kercken Godts.

1

⁺ SIet, den tijt des HEEren coemt, datmen uwen roof wtdeylen sal in v.

+ A vers 1

2

Want ick sal alderley Heydenen

[p. 94r]

tegen Ierusalem vergaderen totten strijt. Ende de Stadt sal ghewonnen, de huysen geplondert, ende de Wijuen gescheynt worden. Ende de helft der Stadt sal geuanghen wech gheuoert worden, Ende dat ouerghebleuen volck en sal wt der stadt niet wtgheroeyt worden.

3

Maer de HEEre sal wt trecken, ende strijden tegen de selue Heydenen, ghelijck als hy plach te strijden, ter tijt des Crijchs.

4

Ende sine voeten sullen op die tijt staen op den Olijfberch, die voor Ierusalem leyt tegent Oosten. Ende den Olijfberch sal hem midden in tween splijten, vanden opganck der Sonnen, totten nederganck toe, seer wijt van malcanderen, Alsoo dat deene helft des Berchs Noortwerts, ende de ander Suytwaerts strecken sal.

5

Ende ghy sult vlieden, voor sulcken dal, tusschen mijne bergen, Want dat dal tusschen de bergen, sal na Heman aen Azal reycken. Iae vlieden sult ghy,^† ghelijck ghy voortijts vloot, voor de Aertbeuinghe, ter tijt Vsie des Conincx Iuda. So sal dan comen, de HEERE mijn Godt, Ende alle Heylighen met v.

† Amos. 1.a.1.

6

⁺ Tot dier tijt, en salder geen licht zijn, maer coude ende Vorst.

+ B vers 6

7

Ende het sal eenen dach zijn, die den HEEre bekent is, Die noch dach noch nacht en sy, Ende ontrent den auont salt licht zijn.

8

Ter seluer tijt^† sullender versche wateren wt Ierusalem vlieten, De helft na de zee teghent Oosten, ende de ander helft na de wterste See, Ende sal dueren beyde des Somers ende des Winters.

† Sacha. 13.a.1 Apoca. 22.a.1.

9

^† Ende de HEEre sal Coninck zijn, ouer alle Lant.^* Op die tijt, sal de HEEre slechs Een zijn, Ende sinen Naem slechs Een.

† Abdie. 1.d.21.

* Ephe. 4.a.5

10

Ende men sal inden gheheelen Lande rontom gaen, ghelijck als op een effen velt, van Gibea na Rimon toe, teghen dat Suyden nae Ierusalem. Want si sal verheuen ende bewoont worden, in hare plaetse. Van de poorte BenIamins aen, al tot de plaetse der eerster poorten toe, tot aen de hoecpoorte.^† Ende vanden toren Hananeel tot aen des Conincx wijnpersse.

† 2.Esd. 3.a.1. Iere. 31.f.38.

11

Ende men sal daer in woonen,^* ende daer en sal geenen Ban meer zijn,^† want Ierusalem sal gheheel seker woonen.

* Apoca. 22.a.3.

† Iere. 33.c.16.

12

Ende dat sal de plaghe zijn, daer de HEERE alle volcken mede plagen sal, die teghen Ierusalem gestreden hebben:⁺ Haer vleesch sal verdwijnen, dewijle dat si noch op hare voeten staen, ende hare ooghen in de holen vergaen, ende hare tonghe inden mont vergaen.

+ C vers 12

13

^† Tot dier tijt, sal de HEERE een groot Rumoer onder haer aenrichten, dat deene den anderen byder handt nemen, ende zijn hant op des anderen hant legghen sal.

† Hagge. 2.d.22

14

^† Want Iuda oock tegen Ierusalem oorloghen sal, op dat vergadert worden de goeden alder Heydenen, die rontsomme zijn, gout, siluer ende cleederen, bouen mate vele.

† Sach. 12.a.2.

15

Ende also sal dan dese plage gaen ouer Peerden, Muylen, Kemelen, Ezels, ende alderley dieren, die in dat selue Heyr zijn, ghelijck als ghene gheplaecht zijn.

16

Ende alle ouerghebleuene onder alle Heydenen, die teghen Ierusalem trocken, sullen Iaerlijcx op comen, om den Coninck, den HEERE Sebaoth te aenbeden, ende om te houden dat^* Loouerhutten feest.

* Leuit. 23.f.34

17

Maer soo wat gheslacht opter Aerden niet op comen en sal, nae Ierusalem, om den Coninc den HEERE Sebaoth te aenbeden, ouer die en salt niet reghenen.

18

Ende in dien dat geslacht der Egiptenaers niet op en treckt, ende coemt, soo en salt ouer haer ooc niet reghenen. Dat sal de plaghe zijn, daer de HEEre alle Heydenen mede plaghen sal, die niet op en comen, om dat Loouerhutten feest te houden.

19

Want dat sal een^* sonde zijn der Egyptenaers, ende alder Heydenen, die niet op en comen, om dat Loouerhutten feest te houden.

* Straffinge der sonden.

20

Tot dier tijt, sal de^† Rustinghe der Peerden, den HEEre heylich zijn. Ende de ketelen inden huyse des HEEren, sullen zijn ghelijck de beckens voor den Altaer.

† Vercieringe

21

Wandt alle ketelen, beyde in Iuda ende Ierusalem, sullen den HEERE Sebaoth heylich zijn. Also dat alle die daer offeren willen, die sullen comen, ende die selue nemen, ende daer in coken. Ende daer en sal gheen Cananite meer zijn, inden huyse des HEEREN Sebaoth, op die tijt.

¶ Eynde des Propheten SacharIa.