Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ Soo wat hier van fonteynen ende reyniginghe geseyt wort, dat behoort al op den tijt Christi.

1

⁺ OP die tijt, sal dat huys Dauids, ende de Borghers tot Ierusalem,^† een vry open Fonteyne hebben, tegen de sonde ende onreynicheyt.

+ A vers 1

† Ezec. 47.a.2. Sach. 14.b.8 Ioan. 10.d.24

2

^* Op die tijt, seyt de HEEre Sebaoth, wil ic der Afgoden namen wtroeyen wt den lande, alsoo datmen haerder niet meer gedencken en sal.^† Daer toe so wil ick oock de Propheten, ende onreyne gheesten, wt den lande drijuen, dattet also toegaen sal:

* Esaie. 2.c.20 Ezech. 30.c.13.

† Iere. 14.b.15.

3

^* Wanneer yemandt meer propheteert, soo sullen zijn vader ende moeder, die hem gewonnen hebben, tot hem seggen: Ghy en sult niet leuen, want ghy spreect luegenen inden Name des HEEREN. Ende alsoo sullen hem de vader ende moeder, die hem ghewonnen hebben, doorsteken, als hy propheteert.

* Deut. 13.b.5.

4

Want het sal tot dier tijt geschieden, dat de Propheten met schanden bestaen, met hare gesichten, als si daer af propheteren. Ende en sullen niet meer eenen rouwen mantel aentrecken, daer si mede bedriegen.

5

⁺ Maer hy sal moeten seggen:^† Ick en ben geen Propheet, maer een ackerman, Want ic heb menschen gedient van mijnder ioncheyt aen.

+ B vers 5

† Amo. 7.c.14.

6

Ende alsmen dan tot hem segghen sal. Wat zijn dat voor wonden in dijne handen? Soo sal hy segghen: Ick ben also geslagen inden huyse der gheenre, die my lief hebben.

7

O sweert, maeckt v op ouer mijnen Herder, ende ouer den Man, die my de naeste is, spreeckt de HEEre Sebaoth.^† Slaet den Herder, so sal haer de Cudde verstroyen, Soo wil ick mijn handt keeren totten cleynen.

† Mat. 26.c.30. mar. 14.d.27. Ioan. 16.d.31.

8

Ende het sal gheschieden, In welcken Lande (spreeckt de HEEre) twee deelen zijn, die sullen wtgheroeyt worden, ende onder gaen,^† Ende dat derden deel sal daer in ouer blijuen.

† Amos. 9.b.8.

9

Ende ic wil dat selue derdendeel door tvier leyden,^* ende louteren, ghelijck alsmen dat siluer loutert, Ende proberen, ghelijck alsmen dat gout probeert.^† Die sullen dan mijnen Name aenroepen, ende ick wilse verhooren. Ick wil segghen:^‡ Het is mijn volck. Ende si sullen segghen: HEERE mijn Godt.

* Sapien. 3.a.6 4.Esd. 16.g.74. 1.Petri. 1.b.7

† Esai. 58.b.9

‡ 2.Co. 6.b.16