Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ De straffinghe des HEEren die hy voorghenomen heeft ouer Israel.

1

⁺ DIt is den last des woorts vanden HEERE ouer Israel, spreeckt de HEEre, die^* den Hemel wtbreyt, ende de Aerde fondeert,^† ende den adem des menschen in hem maect.

+ A vers 1

* Esai. 40.c.22. 44.c.24. 45.b.12.

† Gene. 2.b.7.

2

Siet, ick wil Ierusalem tot eenen tuymelbeker maken, allen volcken die daer rontom zijn.^† Wandt het sal oock Iuda ghelden, als Ierusalem beleghert wort.

† Sac. 14.c.14

3

Nochtans wil ic, ter seluer tijt, Ierusalem tot eenen laststeen maken, allen volcken. Alle die den seluen opheffen willen, die sullen haer daer aen snijden. Wandt alle Heydenen opter Aerden sullen hen teghen haer vergaderen.

4

Ter seluer tijt, seyt de HEERE, wil ic alle peerden schou, ende hare Ruyters banghe maken. Maer ouer Ierusalem wil ick mijne ooghen open hebben, ende alle peerden der volcken met blintheydt plaghen.

5

Ende de Vorsten Iuda sullen seggen in haerder herten: Laet slechs de borgers Ierusalems eenen goeden moet hebben, inden HEERE Sebaoth haren Godt.

6

^+* Ter seluer tijt, wil ick de Vorsten Iuda maken, tot eenen vierigen ouen int hout, ende tot eender Fackelen int stroo, op dat si verteeren, beyde ter rechter ende ter slincker zijde, alle volcken rontom. Ende Ierusalem sal oock voortaen bewoont worden op hare plaetse te Ierusalem.

+ B vers 6

* Abdie. 1.d.18. Amos. 1.a.4.

7

Ende de HEEre sal de Hutten Iuda helpen, ghelijc in voorleden tijden, op dat hem dat huys Dauids niet hooch en beroeme, noch de borghers tot Ierusalem teghen Iuda.

8

Ter seluer tijt, sal de HEEre de borghers tot Ierusalem beschermen, Ende het sal gheschieden, dat soo wie swack zijn sal onder hen, op die tijt, die sal zijn^† ghelijc Dauid. Ende dat huys Dauids sal zijn, ghelijck Godts huys, ghelijc des HEEren Enghel voor haer.

† 1.Reg. 16.c.13

9

⁺ Ende op die tijt sal ic dencken te vernielen alle Heydenen, die teghen Ierusalem ghetoghen zijn.

+ C vers 9

10

Maer ouer dat huys Dauids, ende ouer de borghers te Ierusalem, wil ick wtgieten den^† gheest der ghenaden, ende des ghebets, want si sullen my aensien,^‡ die ghene doorsteken hebben.^* Ende sullen hem beclagen, ghelijck alsmen een eenich kint beclaecht, Ende sullen haer om hem bedroeuen, ghelijck alsmen hem bedroeft om een eerste kint.

† Ezec. 36.d.26. Ioel. 2.f.28. Actu. 2.b.17.

‡ Ioan. 19.d.37

* Luc. 23.c.26.

11

Op die tijt, salder groot roudraghen zijn te Ierusalem,^* ghelijc als daer was bi Hadadrimon, int velt Megiddon. Ende dat lant sal rou draghen, een yeghelijc geslachte bysonder.

* 2.Pa. 35.e.24

12

Dat gheslacht des huys Dauids bysonder, ende hare wijuen bysonder. Dat gheslacht des huys^† Nathan bysonder, ende hare wijuen bysonder.

† 3.Regum. 12.a.1

13

Dat gheslacht des huys Leui bysonder, ende hare wijuen bysonder. Dat gheslacht Simei bysonder, ende hare wijuen bysonder.

14

Alsoo alle andere gheslachten, een yeghelijck bysonder, ende hare wijuen oock bysonder.