Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ Dit Capittel is vol heymelijcx verstants, ende bediedenissen, Item van de destructie des anderen Tempels, Godt ghelijckt hem seluen by eenen Herder.

1

⁺ DOet dijne poorten op O Libanon,^* dattet vier dijne Cederboomen vertere.

+ A vers 1

* Nahu. 3.c.15.

2

Huylt ghy Denneboomen, want de Cederboomen zijn gheuallen, ende de heerlijcke timmeragie is verdestrueert. Huylt ghi eycken Basan, want dat vaste wout is afghehouwen.

3

Men hoort de Herders huylen, want haer heerlijcke Timmeragie is verdestrueert. Men hoort de ionge Leeuwen brullen, Wandt de heerlijcheyt des Iordaens is verdestrueert.

4

Alsoo seyt de HEERE mijn Godt: Hoet de Slachtschapen,

5

Want hare Heeren slaense, ende en houdent voor gheen sonde. Sy vercoopense ende seggen: Ghelouet sy de HEEre, Ic ben nv rijc, Ende hare Herders en sparen haerder niet.

6

Daerom en wil ick oock der inwoonders inden Lande niet meer sparen, spreect de HEEre. Ende siet, Ick wil de Lieden laten eenen yegelijcken in de hant des anderen, ende in de handt zijns Conincks, dat si dat landt in stucken slaen, Ende ick en wilse van haerder hant niet verlossen.

7

⁺ Ende ick hoedde de Slachtschapen, om der ellendigher schapen wille. Ende ick nam twee stocken tot my, Den eenen hiet ick soet, den anderen hiet ick suer, ende hoedde de schapen.

+ B vers 7

8

Ende ic verdede drie Herders, binnen eender Maent, Want ick en vermocht haerder niet, desghelijcx soo en wouden si mijnder oock niet.

9

Ende ick sprac: Ick en wil v niet hoeden, wat daer sterft, dat sterue, wat versmacht, dat versmachte, Ende de ouergebleuene verslinde een yeghelijck des anderen vleesch.

10

Ende ick nam mijnen stock Soet, ende brack hem in stucken, op dat ic^† mijn verbont wech name, dat ic met alle volcken ghemaect had.

† Osee. 2.c.20.

11

Ende het wert in dien daghe wech genomen. Ende de ellendighe schapen, die met my hielden, mercten daer by, dattet des HEEren woort was.

12

Ende ick sprack tot haer: Duncket v goet, soo brengt herwaerts so vele als ick gelde: Is dat niet, soo latet staen.^* Ende si woeghen daer soo vele als ick goude, dertich siluerlinghen.

* Mat. 27.a.9.

13

⁺ Ende de HEEre sprack tot my: Werptet henen, dattet den potbacker ghegheuen worde, Ey een treffelijcke summa, des ick weert gheacht ben van hen. Ende ick nam de dertich siluerlinghen, ende worpse in het huys des HEEren, op dat si den potbackere ghegheuen werden.

+ C vers 13

14

Ende ick brack mijnen anderen stock Suer in stucken, op dat ick de broederschap tusschen Iuda ende Israel, wech name.

15

Ende de HEEre sprack tot my: Neemt noch eens tot v eens dullen Herders ghereetschap.

16

Wan siet, Ick sal Herders inden lande verwecken,^† die dat

† Ezec. 34.a.4.

[p. 93v]

versmachte niet besien, dat verslagen niet soecken, ende dat ghebroken niet heelen, ende dat ghesonde niet besorghen en sullen:

17

Maer dat vleesch der vetten sullen si verslinden, ende hare clauwen verschueren. O godekens Herders, die de Cudde verlaten. Dat sweert come op haren arm, ende op hare rechter ooge: Haren arm moet verdorren, ende hare rechter ooge, doncker worden.