Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ Door de lichamelike belooften leyt de Propheet op de belooften die in Christo veruult zijn, Hy dreycht met de straffinghe den valschen Propheten ende Herders.

1

⁺ DAerom biddet nv vanden HEERE den spaden regen,^† soo sal de HEEre wolcken maken, ende v reghens ghenoech gheuen tot alle vrucht op den velde.

+ A vers 1

† Deut. 28.b.12

2

Want de Godekens spreken enckel moeyte, Ende de Waerseggers sien^† enckel lueghenen, ende spreken ydel onnutte droomen, ende hare troosten en is niets niet. Daeromme gaen si dwalende, ghelijc een cudde, ende si zijn versmacht, dewijle datter gheen^* Herder en is.

† Ezech. 13.a.6.

* Ezech. 13.a.3.

3

Mijnen thoorne is op de Herders vergramt, Ende ick wil de Bocken besoecken. Wandt de HEERE Sebaoth sal zijn cudde besoecken, namelijc dat huys Iuda, Ende hy salse toerusten, ghelijck een verciert Peert tot den strijdt.

4

De hoecken, naghels, strijtbogen, ende Drijuers, sullen alle van hem wech comen:

5

Ende sullen nochtans euen wel zijn, ghelijc de Ruesen, die dat slijc opter straten inden strijdt vertreden, ende sullen strijden, Wandt de HEERE sal met haer zijn, also dat de Ruyters tot schande worden.

6

⁺ Ende ick wil dat huys Iuda stercken, ende dat huys Iosephs helpen, Ende ick wilse weder insetten. Wandt ick ontferme my haerder. Ende si sullen zijn, gelijck si waren, doen ickse niet verstooten en had. Want ick de HEEre hare God wilse verhooren.

+ B vers 6

7

Ende Ephraim sal zijn, als een Ruese, ende haer herte sal vrolijc worden, als vanden wijn. Daer toe hare kinderen sullent sien, ende haer verblijden, dat haer herte inden HEEre vrolijck sy.

8

Ick wilse aenblasen, ende haer vergaderen, want ick wilse verlossen. Ende si sullen haer vermeerderen, ghelijc si haer voormaels vermeerdert hebben.

9

Ende ic wilse onder de volcken saeyen, op dat si mijnder gedencken in verre landen, Ende si sullen met hare kinderen leuen ende weder comen.

10

Want ic wilse weder brengen wt Egipten lant, ende wilse vergaderen tot Assyria, ende wilse int lant Gilead, ende Libanon brengen, alsoo datmense niet vinden en sal.

11

Ende hy sal door de zee des angsts gaen, ende de baren in der zee slaen, Also dat alle diepe wateren verdrooghen sullen.^† Dan sal de heerlijcheyt te Assyrien vernedert worden.^* Ende dat Scepter in Egipten sal ophouden.

† Esaie. 10.a.5.

* Ezec. 29.a.2

12

Ick wilse stercken inden HEERE, dat si in sinen Name wandelen sullen, spreect de HEEre.