Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ Blijde dingen worden hier vercondicht, ende beloeft, vande roepinghe der Heydenen.

1

⁺ DIt is den last daer de HEEre af spreect ouer dat lant Hadrach, ende ouer Damascum, op welcke dattet hem verlaet (want de HEERE siet op de menschen, ende op alle stammen Israels)

+ A vers 1

2

Daer toe ooc ouer Hamath, die met haer paelt, oock ouer^† Tyrum ende Sidon, die gheheel cloeck zijn.

† Ioel. 3.a.4. Esai. 23.a.1. Ezech. 26.a.2. 27.a.2. 28.a.2.

3

Want Tyrus timmert vasticheyt, ende vergadert syluer, ghelijck als sant, ende gout als slijck opter straten.

4

Maer siet, de HEEre salse verderuen, ende sal haer macht diese op de See heeft, slaen, dat sy zijn sal, als de ghene die metten vyere verbernt is.

5

Als dat Asklon sien sal, so sal sy verschricken, ende^† Gaza sal seer beangst worden. Daer toe Ekron sal bedroeft zijn, als sy sulcx siet. Want het sal wt zijn met den Coninck tot Gaza, ende tot Asklon en salmen niet woonen.

† Iere. 47.a.1. Amo. 1.b.6.

6

Tot Asdod sullen Vreemde woonen, Ende ick wil der Philisteen heerlicheyt wtroyen.

7

Ende ick wil haer bloet van haren monde nemen, ende haren grouwel van hare tanden. Dat sy oock onsen Gode sullen ouerblijuen, op dat sy worden gelijck Vorsten in Iuda, ende Ekron, als de Iebusiten.

8

^† Ende ick wil selue om mijn huys den leger zijn, dat niet en behoeft staens, ende gins ende weder gaens, op dat de Drijuer niet meer ouer haer en come, Want ick hebt nv aengesien met mijnen ooghen.

† Sach. 2.a.5.

9

^+* Maer ghy dochter Sion, verblijt v seer, Ende ghy dochter Ierusalem iuycht. Siet, dijn Coninck coemt tot v, een Rechtuaerdige, ende een Helper,^† Arm, ende rijdet op eenen Ezel, ende op een ionck vuelken der Ezelinnen.

+ B vers 9

* Sach. 2.b.10. Esai. 62.c.11. Matt. 21.a.5. Ioan. 12.b.15.

† ellendich

10

Want ick wil de wagens wech nemen van Ephraim, ende der Peerden van Ierusalem,^† Ende den strijtboge sal in stucken ghebroken worden. Want hy sal vrede leeren onder de Heydenen,^* ende zijn heerschappie sal zijn, van die een See tot de andere, Ende vanden water, tot aen der Wereldt eynde.

† Esaie. 2.a.4. Ozee. 2.c.20.

* 3.Re. 4.b.21 Psal. 72.b.8.

11

Ghy laet oock door dat bloedt dijns verbonts wt,^† uwe gheuanghene wt de cuylen, daer geen water in en is.

† Esai. 42.a.7.

12

Daerom keert v nv totter vasticheyt, ghy die op hope geuangen ligt. Want ooc heden wil ick vercondigen, ende v dubbelt vergelden.

13

⁺ Want ic hebbe my Iuda gespannen tot eenen boghe, ende Ephraim ghewapent. Ende ick wil uwe kinderen Sion, verwecken, ouer uwe kinderen, Grieckenlandt, Ende wil v maken als een sweert der Ruesen.

+ C vers 13

14

Ende de HEEre sal ouer hen verschijnen, ende zijne pijlen sullen wt varen, ghelijck den blixem. De HEEre HEEre sal de Basuyne blasen, Ende sal daer henen treden, ghelijck de tempeesten vant Suyden.

15

^* De HEEre Sebaoth salse beschermen, op dat sy verslinden, ende onder haer brengen^† met slingersteenen, op dat sy drincken ende rumoeren, als vanden wijn, ende vol worden, als dat becken, ende ghelijc als de hoecken des Altaers.

* Sach. 2.a.5.

† 1.Re. 16.f.49

[p. 93r]

16

Ende de HEEre hare Godt, sal haer ter seluer tijt helpen, als een cudde zijns volcx, Want in sinen lande sullen heylige steenen opgericht worden.

17

^† Want wat hebben si goets voor andere lieden, ende wat hebben si schoons voor andere lieden? O coorn, dat Ionghelinghen, ende most, die maechden opuoet.

† Deut. 33.c.29. Baruc. 3.e.42