Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ Godt onderwijst zijnen volcke wat dat recht vasten sy, oordeel ende gherechticheyt te onderhouden, den naesten goet doen, weduwen ende weesen beschermen, niemandt onrecht noch ghewelt doen.

1

⁺ ENde het gheschiede inden vierden Iare des Conincx Darij dat des HEEren woordt gheschiedde tot SacharIa, opten vierden dach der negender maent, Welcke heet Chisleu,

+ A vers 1

2

Doen SarEzer ende RegemMelech met haren Lieden na BethEl seynden, om voor den HEEre te bidden,

3

Ende deden den Priesteren segghen, die om dat huys des HEEren Sebaoth waren ende tot den Propheten: Moet ick oock noch weenen in de^† vijfste maent, ende my onthouden, ghelijck ick nv van sommige Iaren afghedaen hebbe?

† 4.Reg. 25.b.8

4

Ende des HEEren Sebaoths woort gheschiedde tot my, ende sprac:

5

Segt alle den volcke inden Lande, ende den Priesteren, ende spreeckt: Doen ghy vaste, ende rouwe droecht, in de vijfste ende^† seuenste maent, dese tseuentich iaer lanc, hebt ghy my also geuastet?

† Iere. 41.a.1. 4.Re. 25.d.25

6

Oft doen ghy aet, ende dronckt, en hebt ghy niet voor v selfs gegheten ende gedroncken?

7

En ist niet dat, dat welck de HEEre liet prediken, door de voorleden Propheten, Doen Ierusalem bewoont werdt, ende genoech hadde, met hare steden, ende doen daer Lieden woonden beyde tegen tzuyden ende in de Valleyen?

8

⁺ Ende des HEEren woordt gheschiede tot SacharIa, ende sprack.

+ B vers 8

9

Alsoo seyt de HEEre Sebaoth:^† Oordeelt recht, Ende een yegelijc bewijse aen zijnen broeder goedertierenheyt ende bermherticheyt.

† Sach. 8.c.16.

10

^* Ende en doet gheen onghelijck den weduwen, Weesen, vreemdelingen ende armen. Ende niemant en dencke tegen zijnen broeder yet quaets, in zijnder herten.

* Exod. 22.c.22. Iere. 5.d.26. Esai. 1.c.23.

11

^* Maer sy en wouden niet op mercken, ende sy keerden my den rugghe toe, ende verstockten hare ooren, op dat sy niet hooren en souden.

* Ierem. 7.c.23.

12

Ende maecten hare herten, als eenen Diamant op dat sy niet hooren en souden, de wet ende de woorden,^* Welcke de HEEre Sebaoth seynde on zijnen geest, door de voorgaende Propheten.

Daerom isser oock soodanighen grooten toorne vanden HEEre Sebaoth gecomen.

* Dani. 9.a.10.

13

Ende het is also gheschiet, gelijck alser gepredict wert, ende sy niet en hoorden,^† Soo en woude ick oock niet hooren, doen sy riepen, spreect de HEEre Sebaoth.

† Iere. 11.b.11. Prou. 1.c.28. Esaie. 1.b.15.

14

Alsoo heb icse verstroyt, onder alle Heydenen, die sy niet en kennen. Ende dat lant is achter hen woest ghebleuen, datter niemandt in en wandelt noch en woont, Ende dat Edele lant is tot een woestijne ghemaect.