Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ In dit Visioen wort de Almachtige cracht Gods bewesen, Die vrede geeft welcken volcke hy wil, Ende wederom oorlooch den welcken hy wil.

1

⁺ ENde ick hief mijn oogen weder op, ende sach, Ende siet, Daer waren vier wagens, die ghingen tusschen twee Berghen voort. Ende de selue Bergen waren metalen.

+ A vers 1

2

Voor den yersten wagen waren^† roode peerden.

† Sach. 2.b.8. Apo. 6.a.4.

3

Voor den anderen wagen waren swerte peerden. Voor den derden wagen waren witte peerden. Voor den vierden wagen waren bonte stercke peerden.

4

Ende ick antwoorde, ende seyde totten Engel, die met my sprack: Mijn Heere wie zijn dese?

5

De Engel antwoorde, ende sprack tot my: Het zijn de vier^* winden onder den Hemel, die voort comen, op dat sy treden voor den Heerschapper ouer alle landen.

* Iere. 4.b.12.

6

Daer de swerte peerden voor waren, die ginghen tegent Noorden, Ende de witte gingen hen na. Maer de bonte gingen tegent Suyden.

7

De stercke gingen ende togen om, dat sy alle dat lant doortogen. Ende hy sprack: Gaet henen, ende trect door dat lant. Ende si togen doort lant.

8

Ende hy riep my, ende sprack met my,

[p. 92r]

ende seyde: Siet, die tegent Noorden trecken, die doen mijnen gheest rusten, inden lande teghent Noorden.

9

⁺ Ende des HEEren woort geschiede tot my, ende sprac:

+ B vers 9

10

Neemt van de geuanghene, te weten, van Heldai, ende van Tobia, ende van Iedaia, ende coemt inden seluen dage, ende gaet int huys Iosie, des soons Sephania, die van Babel ghecomen zijn.

11

Ende neemt siluer ende gout, ende maect Croonen, ende setse op dat hooft Iosua, des hoogen Priesters, des soons Iozadak,

12

Ende segt tot hem: De HEERE Sebaoth seyt also: Siet, daer is een Man, die heet^† Semah. Want onder hem salt wassen,

† Sach. 3.b.8.

13

Ende hy sal des HEEren Tempel timmeren. Ia den Tempel des HEEren sal hy timmeren, Ende hy sal dat cieraet draghen, Ende sal sitten, ende heerschappen op zijnen Throone, sal ooc Priester zijn op zijnen Throone, Ende daer sal vrede zijn tusschen die beyden.

14

Ende de Croonen sullen den Helem, Tabia, Iedaia, ende Hen, den sone Sephania, tot eender gedachtenisse zijn inden Tempel des HEEren.

15

Ende daer sullender van verre comen, die aen des HEEren Tempel timmeren sullen.^† Dan sult ghy beuinden, dat my de HEERE Sebaoth tot v gesonden heeft. Ende dat sal gheschieden, ist dat ghy der stemmen ws HEEren ws Gods, ghehoor gheuen sult.

† Sach. 4.b.9.