Den Bibel, Inhoudende dat Oude ende Nieuwe Testament (Biestkensbijbel)

[p. 91v]

¶ Dat .iiij. Capittel.

¶ Een ander openbaringe, waer in Serubabel sterck ende manlijck ghemaect wort, Hoe wel des volcx weynich ende oock cleyn sy, Het sal nochtans gheoeffent worden, Ende hem en sal niemant wederstaen, De rechte bediedinghe ende verborgentheyt reyct op Christum.

1

⁺ ENde de Engel die met my sprack, quam weder, Ende wecte my op, gelijck als een die wt den slape gewect wort.

+ A vers 1

2

Ende sprac tot my: Wat siet ghy? Maer ick sprack: Ick sach, Ende siet, daer stont eenen Candelaer, gansch gulden, met een schale daer bouen op, daer^* seuen Lampen aen waren, ende seuen Trechters aen elcke Lampe,

* Apoc. 4.a.5.

3

^‡ Ende twee Olijfboomen daer by, deene op de rechte sijde der schalen, ende dander ter slincker sijde.

‡ Apoc. 11.a.4.

4

Ende ick antwoorde ende seyde totten Enghel, die met my sprack: Mijn Heere wat is dat?

5

Ende de Enghel die met my sprack, antwoorde, ende sprack tot my: En weet ghy niet wat dat is? Ick seyde: Neen mijn Heere.

6

Ende hy antwoorde, ende sprack tot my: Dat is dat woort des HEEren van SeruBabel^† Het en sal niet door een heyr, oft door cracht, Maer door mijnen geest gheschieden, seyt de HEEre Sebaoth.

† Esaie. 11.a.4.

7

Wie zijt ghy, ghy groote Berch, die doch voor SeruBabel een effen velt worden moet? Ende hy sal den yersten steen opbouwen, datmen roepen sal: Geluck ende Heyl, Geluck ende Heyl.

8

⁺ Ende dat woort des HEEren gheschiede tot my, ende sprack:

+ B vers 8

9

De handen SeruBabels hebben dit huys ghefundeert, zijne handen sullent oock voleynden^† op dat ghy beuint, dat my de HEEre Sebaoth tot v gesonden heeft.

† Deu. 18.d.21. Sach. 6.b.15.

10

Want wie isser die dese cleyne daghen veracht? Daermen hem doch in verhueghen sal, ende siet, de tennen mate in SeruBabels hant, metten seuenen, welcke des HEEren ooghen zijn, die dat gansche Lant door trecken.

11

Ende ick antwoorde ende sprack tot hem: Wat zijn de^† twee Olijfboomen ter rechter ende ter slincker sijden des Candelaers?

† Apoc. 11.a.4.

12

Ende ic antwoorde anderwerf: Wat zijn de twee tacken der Olijfboomen, die by de twee gulden Snutters staen des gulden Candelaers, daermen mede^† afneemt bouen vanden gulden Candelaer?

† Snut.

13

Ende hy sprack tot my: En weet ghy niet wat die zijn? Maer ick sprack: Neen mijn Heere.

14

Ende hy sprac: Het zijn de twee Oly kinderen, die daer staen byden heerschapper des gantschen Lants.