Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

Een bediedinge in Iosua op Iesum onsen Heere die onse ouerste Priester is.

1

⁺ ENde my wert vertoont de hooghe Priester Iosua, staende voor den Engel des HEEren,^† Ende de Satan stont tot zijnder rechter hant om hem te wederstaen.

+ A vers 1

† Psal. 109.a.6

2

Ende de HEEre sprack totten Satan,^† De HEEre berispe v ghy Satan: Ia. De HEEre berispe v die Ierusalem vercoren heeft, En is dese niet eenen brant, die wt den vyere geruckt is?

† Iudas. 1.b.9.

3

Ende Iosua hadden onreyne cleederen aen, Ende stont voor den Enghel.

4

De welcke antwoorde ende sprack. tot den ghenen die voor hem stonden: Neemt de onreyne cleederen van hem.

5

Ende hy sprack tot hem: Siet, ick heb uwe sonden van v ghenomen, ende, hebbe v vyercleederen aenghetoghen. Ende hy sprac: Set eenen reynen Hoet op zijn hooft. Ende sy setteden eenen reynen Hoet op zijn hooft. Ende toghen hem cleederen aen, Ende de Engel des HEEren stont daer.

6

⁺ Ende de Enghel des HEEren betuychte Iosua, ende sprac:

+ B vers 6

7

Also spreect de HEEre Sebaoth: Indien ghy in mijne weghen wandelt, Ende mijne wacht gayslaet, So sult ghy mijn huys regeren, ende mijne Houen bewaren, Ende ick wil v gheuen van desen, die hier staen, dat sy v gheleyden sullen.

8

Hoort toe, O Iosua ghy hooghe Priester, ghy ende dijne vrienden, die voor v woonen, Want sy zijn enckel wonderen. Want siet, Ick wil mijnen knecht^* Semach laten comen.

* Sach. 6.b.12.

9

Want siet, op den eenighen^† steen, die ick voor Iosua gheleyt hebbe, sullen seuen oghen zijn. Maer siet, ick wil hem wthouwen, seyt de HEERE Sebaoth, ende wil de sonden des seluen Lants wech nemen, op eenen dach.

† Esa. 28.c.16.

10

Ter seluer tijt, spreeckt de HEEre Sebaoth, sal deen den anderen nooden onder den Wijnstock, ende onder den Vijgeboom.