Den Bibel, Inhoudende dat Oude ende Nieuwe Testament (Biestkensbijbel)

¶ Dat ij. Capittel.

¶ Den Propheet worden openbaringhen vertoont, welcke de verlossinge wt der Babyloonscher geuanckenisse bedieden, Ende de verlossinge oock die door Christum gheschiet is.

1

⁺ ENde ick hief mijn oogen op, ende sach, Ende siet,^* een man hadde een meetsnoer inder hant.

+ A vers 1

* Ezec. 43.c.13. Apoc. 21.c.15.

2

Ende ick seyde: Waer gaet ghy henen? Maer hy sprack tot my: Dat ick Ierusalem mete, ende sie toe, hoe lanck ende wijdt dat sy zijn sal.

3

Ende siet, de Engel, die met my sprack, ghinck wt. Ende daer ghinck een ander Engel wt hem teghen,

4

Ende sprack tot hem: Loopt henen, ende segt desen Iongelinck, ende spreect: Ierusalem sal bewoont worden sonder mueren, van een groote menichte der menschen, ende der beesten, die daer in zijn sal.

5

Ende^† ick wil, spreect De HEERE, een vyerige muer daer rontom zijn, Ende wil daer in zijn, ende wil my heerlijck daer in bewijsen.

† Deu. 4.d.24. Sach. 9.a.8.

6

Huy, huy, vliet wt den Noortschen Lande, seyt de HEEre.^† Want ic heb v inde vier winden onder den Hemel verstroyt, seyt de HEEre.

† Iere. 25.b.8.

7

^‡ Huy Sion, ghy die daer woont byder dochter Babels, ontloopt.

‡ Ier. 50.b.8. 51.a.6. Apoc. 18.b.4.

8

⁺ Wandt alsoo seyt de HEEre Sebaoth: Hy heeft my gesonden tot de Heydenen, die v berooft hebben, Hare macht heeft een eynde:^† Wie v aentast, die tast zijnen oogenappel aen.

+ B vers 8

† Pro. 14.d.31. 17.a.5. Ier. 1.a.1.c.22 10.d.25. 30.c.16. Psal. 17.b.8. Mat. 25.d.40 Acto. 9.a.5. Luc. 10.b.16.

9

Want siet, ic wil mijn hant ouer haer bewegen,^* dat sy eenen roof worden sullen, den genen die haer ghedient hebben, dat ghy sult beuinden, dat my de HEERE Sebaoth ghesonden heeft.

* Esai. 14.a.

10

^‡ Verblijt v, ende weest vrolijck, O ghy dochter Sion, Want siet, ic come, ende wil by v woonen, spreect de HEEre.

‡ Exo. 25.a.8. Mat. 28.c.20. Soph. 3.c.14.

11

Ende ter seluer tijt, sullen veel Heydenen den HEEre^† toegedaen worden, Ende sullen mijn volc zijn,^* Ende ic wil by v woonen, dat ghy vernemen sult, dat my de HEEre Sebaoth tot v gesonden heeft.

† toegeuoecht

* Leu. 26.b.12 2.Cor. 6.b.16.

12

Ende de HEEre sal Iuda beeruen, voor zijn deel, inden heyligen lande, Ende sal Ierusalem weder verkiesen.

13

^† Alle vleesch sy stille voor den HEEre, Want hy heeft hem opgemaect van zijnder heyliger stede.

† Seph. 1.b.7.