Den Bibel, Inhoudende dat Oude ende Nieuwe Testament (Biestkensbijbel)

¶ De Propheet SacharIa.

¶ Dat eerste Capittel.

¶ Hy vermaent dat volck dat si der stemmen Godts niet onghehoorsaem en souden zijn, ghelijck hare Vooruaders, Maer haer bekeeren souden, Ende hy vercondicht haer in eender openbaringhe vrolijcke dinghen.

1

⁺ INde achtste maent des tweeden Iaers, des Conincx Darij, geschiede dit woort des HEEren tot^† SacharIa den sone BerechIa, des soons Iddo, den Propheet, ende sprack.

+ A vers 1

† Mat. 23.e.34 2.Pa. 24.d.20

2

De HEERE is toornich gheweest op uwe Vooruaders.

3

Ende spreect ghy tot haer: Also spreect de HEEre Sebaoth:^† Keert v tot my, spreect de HEEre Sebaoth, So wil ick my tot v keeren, seyt de HEEre Sebaoth.

† Iere. 15.d.19. 31.c.18. Malac. 3.b.7.

4

En weest niet ghelijc uwe Vooruaders,^† den welcken de voorleden Propheten predicten, ende spraken: Alsoo seyt de HEEre Sebaoth: Keert v van uwe boose wegen, ende van uwe boose wercken.^* Maer si en gauen gheen ghehoor, ende en achteden op mi niet, seyt de HEEre.

† Esaie 31.b.6. 55.a.7. Ierem. 3.a.7. Ezech. 18.e.30 20.a.7. 33.b.11 Ozee. 14.a.1. Iohel. 2.b.12.

* Ier. 25.a.4. 29.c.19. 35.c.15 44.a.5.

5

Waer zijn nv uwe Vooruaders ende de Propheten? Leuen si ooc noch?

6

En ist niet alsoo, dat mijne woorden ende mijne Rechten, die ick door mijne knechten de Propheten gheboot, uwe Vooruaders gheraect hebben? Dat si haer hebken moeten omkeeren, ende seggen:^† Ghelijck als de HEERE Sebaoth inden sin had ons te doen, na dat wy ghingen ende deden, Alsoo heeft hy ons oock ghedaen.

† Danie. 9.a.7.

7

⁺ Opten vierentwintichsten dach der elfster maent, die daer is de maent Sebat, inden anderden iare des Conincks Darij, gheschiede dit woort des HEEren tot SacharIa den sone BerechIa, des soons Iddo, den Propheet, ende sprac:

+ B vers 7

8

Ic sach by nacht, ende siet, Een man sat op een^† root Peert, ende hy hielt onder de Mirteboomen, inde Beemden, Ende achter hem waren roode, bruyne, ende witte Peerden.

† Sacha. 6.a.2 Apoca. 6.a.4

9

Ende ick sprac: Mijn HEEre, wie zijn dese? Ende de Enghel die met my sprac, seyde tot my: Ick wil v te kennen gheuen, wie dese zijn.

10

Ende de man, die onder de Mirteboomen hielt, antwoorde, ende sprack: Dese zijn de ghene, die de HEEre wtghesonden heeft, dat Landt door te trecken.

11

Maer si antwoorden den Enghel des HEEren, die onder de Mirteboomen hielt, ende spraken, Wy zijn doort lant ghetoghen, Ende siet, alle landen sitten stille.

[p. 91r]

12

⁺ Doen antwoorde de Engel des HEEREN, ende sprack: O HEEre Sebaoth, hoe langhe en wilt ghy dan niet ontfermen Ierusalems, ende der steden Iuda, op de welcke ghy toornich gheweest zijt^† dese tseuentich iaren lanck?

+ C vers 12

† Iere. 25.b.12. 29.b.10. 1.Esdre. 1.a.1.

13

Ende de HEERE antwoorde den Enghel, die met my sprack, vriendelijcke woorden, ende troostlijcke woorden.

14

Ende de Engel, die met my sprack, seyde tot my: Predickt, ende segt: Alsoo seyt de HEERE Sebaoth:

15

^† Ick heb seer gheijuert ouer Ierusalem ende Sion. Maer ick ben seer vertoornt, op de stoute Heydenen, want ick was slechs een weynich toornich, maer sy holpen tot verderf.

† Sacha. 8.a.2.

16

Daerom seyt de HEEre also:^† Ick wil my weder tot Ierusalem keeren met bermherticheyt, ende mijn huys sal daer in ghetimmert worden, seyt de HEEre Sebaoth, Daer toe sal dat timmersnoer in Ierusalem ghetogen worden.

† Sach. 8.a.3.

17

Ende predict voorder, ende segt: Also seyt de HEEre Sebaoth: Het sal mijne steden wederom welgaen, Ende de HEEre sal Sion weder troosten, Ende sal Ierusalem weder verkiesen.

18

Ende ick hief mijn ooghen op, ende sach, Ende siet, Daer waren vier hoornen.

19

Ende ick seyde totten Engel, die met my sprack: Wie zijn dese? Hy sprack tot my: Het zijn de vier hoornen, die Iuda tsamen met Israel ende Ierusalem verstroyt hebben.

20

Ende de HEEre wees my vier smeden.

21

Doen sprac ick: Wat willen die maken? Hy sprack:^† De hoornen, die Iuda also verstroyt hebben, dat niemant zijn hooft en heeft connen opheffen. Om de selue te veruaren, zijn dese ghecomen, op dat sy de hoornen der Heydenen af stooten souden, welcke den hoorne ouer dat Landt Iuda gheheuen hebben, om dat selue te verstroyen.

† Dan. 7.d.24.