Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Hy sterckt de Ouersten wt beuel des HEEren, dat si manlijck souden zijn, ende niet ophouden en souden. Van de vercieringhe ende heeerlijcheyt des anderen Tempels, door den welcken de kercke der gheloouigher verstaen wordt.

1

⁺ INden vierentwintichsten dach der sester maent, inden tweeden Iare des Conincx Darij,

+ A vers 1

2

Opten eenentwintichsten dach der seuender maent, gheschiede des HEEREN woort, tot den Propheet Haggai, ende seyde:

3

Segt tot SeruBabel den sone Sealthiel, den Vorste Iuda, ende tot Iesua den sone Iozadak, den hooghen Priester, Ende totten ouerghebleuen volcke, ende segt:

4

^† Wie isser onder v lieden ouergebleuen, die dit huys in zijnder voorleden heerlijckheyt gesien heeft? Ende hoe siet ghijt nv aen? Ist niet also: Het en dunct v niets niet te zijn?

† 1.Esd. 3.c.12.

5

Ende nv SeruBabel^* hebt eenen goeden moet, spreect de HEEre. Sijt goets moets Iesua ghy sone Iozadack, ghy hooge Priester. Hebt eenen goeden moet alle dat volck inden Lande (spreeckt de HEEre) ende arbeyt,^† Wandt ick ben met v, seyt de HEEre Sebaoth.

* Deut. 31.b.6. Iosue. 1.b.7.

† Hagge. 1.c.13.

6

Nae dat woort, doen ick met v een verbondt maeckte als ghy wt Egipten toocht, sal mijnen geest onder v blijuen, En weest niet versaecht.

7

⁺ Want de HEEre Sebaoth spreeckt also:^† Daer is noch een cleyne tijt toe, dat ic Hemel ende Aerde, de See, ende het drooghe beweghen sal.

+ B vers 7

† Hebr. 12.d.26

8

Ia alle Heydenen wil ick beweghen.^† Soo sal dan comen alder Heydenen Troost. Ende ic wil dit huys vol heerlijcheyt maken, spreeckt de HEERE Sebaoth.

† Esaie. 60.a.1.

9

Want mijn is beyde dat siluer ende gout, spreeckt de HEERE Sebaoth.

10

De heerlijcheyt des laetsten huys sal grooter worden, dan des eersten geweest is, spreect de HEERE Sebaoth. Ende ick wil vrede gheuen, op dese plaetse, seyt de HEERE Sebaoth.

11

Opten vierentwintichsten dach der neghender maent, inden tweeden Iare Darij, gheschiede des HEEren woort totten Propheet Haggai, ende seyde:

12

Alsoo spreeckt de HEEre Sebaoth: Vraecht de Priesters nader Wet, ende segt:

13

Wanneer yemant^† heylich vleesch droech, inder slippe zijns cleets, ende raecte met zijnder slippen dan broot, cueckenspijse, Wijn, Olie, oft anders eenigherley spijse, werdet oock heylich? Ende de Priesters antwoorden, ende spraken:

† Ierem. 11.c.15

[p. 90v]

Neen.

14

Haggai sprack:^† Maer wanneer een, die onreyn is, van een aengheroert aes, dier dingen eenich aenroerde, werdet oock onreyn? De Priesters antwoorden, ende spraken: Het werde onreyn.

† Leuit. 5.a.2. 11.d.27. Num. 19.b.11

15

Doen antwoorde Haggai, ende sprack: Effen also is oock dit volck ende dese Lieden voor my, seyt de HEERE,⁺ Ende alle haerder handen werck, Ende soo wat si offeren, dat is onreyn.

+ C vers 15

16

Ende nv siet, hoe dattet v ghegaen is van desen dach aen, ende te voren, eer datter eenen steen opten anderen geleyt wert, aenden Tempel des HEEren.

17

^* Alsoo dat als een tot eenen Coornhoop quam, die twintich maten hebben soude, soo en warender nauwelijc thien.^† Quam hy totter wijnpersse, ende meynde, vijftich Amen te vullen, so en warender nauwelijck twintich.

* Ozee. 2.c.17. Hagge. 1.a.6 b.9.

† Esai. 5.b.10.

18

Wandt^* ick plaechde v met dorheyt, brantcoorn, ende haghel, in alle uwen arbeyt, Nochtans en bekeerdet ghy v niet tot my, spreeckt de HEEre.

* Amos. 4.b.9

19

Daerom merct nv daer op van desen dach aen ende te voren, te weten, vanden vierentwintichsten dach der neghender maent, totten dach toe, dat den Tempel des HEEren ghefundeert is. Siet daer op,

20

Wandt dat saet leyt noch inder Schueren, ende daer en draecht noch niet, noch den Wijnstock, Vijgheboom, granaetboom, noch den Olijfboom.^† Maer van desen dach aen wil ick segheninghe gheuen.

† Sacha. 8.b.12

21

⁺ Ende des HEEren woort gheschiede wederom tot Haggai, opten vierentwintichsten dach vander maent, ende sprack:

+ D vers 21

22

Segt SeruBabel den Vorst Iuda, ende spreect:^* Ick wil Hemel ende Aerde bewegen,

* Hagge. 2.b.7

23

Ende wil de stoelen der Conincrijcken omkeeren, ende de machtighe Conincrijcken der Heydenen vernielen, ende wil beyde de Waghens met haren Ruyteren omkeeren, dat beyde Peert ende Man, ter neder vallen sullen,^* een yeghelijck door des anderen sweert.

* Iudic. 7.e.22.

24

Ter seluer tijt, spreect de HEEre Sebaoth, Wil ic v^† SeruBabel ghy sone Sealthiels mijnen knecht, nemen, spreect de HEEre, ende wil v, ghelijck als eenen seghelrinck houden, want ick heb v wtuercoren, spreect de HEERE Sebaoth.

† Eccl. 49.b.13. 1.Esd. 3.a.2. 3.Esd. 5.a.6.

¶ Eynde des Propheten Haggai.