Den Bibel, Inhoudende dat Oude ende Nieuwe Testament (Biestkensbijbel)

[p. 90r]

¶ De Propheet Haggai.

¶ Dat eerste Capittel.

¶ Hy vermaent dat volc tot de timmeragie des Tempels, Ende hy straft haer lancsaem vertrecken.

1

⁺ INden tweeden Iare des Conincx^† Darij, in de seste Maent, opten eersten dach der maent, gheschiede des HEEREN woort door den Propheet^† Haggai, tot SeruBabel den sone Sealthiel, den Vorste Iuda, ende tot Iesua, den Sone Iozadac, den hooghen Priester, ende sprac:

+ A vers 1

† 1.Esd. 6.c.13. Danie. 6.a.1. 9.a.1.

† 1.Esd. 5.a.1.

2

Also spreect de HEEre Sebaoth. Dit volck spreect: De tijt en is noch niet gecomen, datmen der HEEren huys timmere.

3

Ende des HEEren woort gheschiede door den Propheet Haggai:

4

^† Maer uwen tijt is gecomen dat ghy in ghewelfde huysen woont, Ende dit huys moet woest staen.

† Ierem. 22.b.13

5

Daerom spreeckt de HEEre Sebaoth alsoo: Siet, hoe dattet v gaet.

6

^* Ghy saeyt veel, ende brengt weynich in. Ghy eet, ende wort nochtans niet versaet. Ghy drinckt, ende en^† wordt nochtans niet droncken. Ghy cleedt v, ende en condt v nochtans niet verwermen. Ende so wie ghelt verdient, die legghet in eenen holen buydel.

* Leuit. 26.d.26 Mich. 6.c.14. Ozee. 4.b.10. Malac. 3.b.9.

† Verslaet den dorst niet.

7

⁺ Also seyt de HEEre Sebaoth: Siet hoe dattet v gaet.

+ B vers 7

8

Gaet henen op dat geberchte, ende haelt hout, ende timmert dat huys, dat sal my aenghenaem zijn. Ende ick wil mijn eere bewijsen, spreect de HEERE.

9

Want ghy wacht wel op vele, ende siet, het wort weynich. Ende al brengt ghijt thuys, so blaes icker doch in, ende het verwaeyt. Waerom dat? Spreect de HEEre Sebaoth. Daerom, dat mijn huys soo woest staet, ende een yeghelijck loopt nae sinen huyse toe.

10

^† Daerom heeft den Hemel ouer v den dauwe onthouden, ende dat Aertrijck zijn vrucht.

† Deut. 28.d.23.

11

Ende ic hebbe de dorheyt gheroepen, beyde ouer dat Lant ende Berghen, ouer Coren, Most, Olie, ende ouer alle tghene dat wt der Aerden coemt, oock ouer menschen ende beesten, ende ouer allen arbeyt der handen.

12

⁺ Doen gaf SeruBabel de sone Sealthiel, ende Iesua, de sone Iozadak, de hooghe Priester, ende alle ouerghebleuene des volcx, sulcken stemme des HEEREN haers Gods, ende de woorden des Propheten Haggai ghehoor, ghelijc als hem de HEEre haer Godt ghesonden hadde, ende dat volck vreesde hen voor den HEERE.

+ C vers 12

13

Doen sprack Haggai de^† Enghel des HEEREN, die de boot-schappe des HEEREN hadde aen dat volck:^† Ick ben met v, seyt de HEEre.

† Bode oft Legaet.

† Deut. 7.e.21.

14

Ende de HEEre^* verwecte den gheest SeruBabels, des soons Sealthiel des Vorsten Iuda, ende den geest Iesua des soons Iozadac des hooghen Priesters, ende den gheest des gantschen ouerghebleuen volcx, dat si quamen, ende arbeyden aent huys des HEEren Sebaoth haers Godts.

* 1.Esd. 5.a.2.