Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Hy berispt ende straft de Ioden, om haerder lasteringhen, Om welcker wille haer Godt verstooten ende de Heydenen aennemen sal.

1

⁺ VVee der grouwelijcker, beuleckter ende Tyrannisscher stadt,

+ A vers 1

2

Sy en wil gheen ghehoor gheuen, noch haer niet laten castien. Sy en wil op den HEEre niet betrouwen, noch haer tot haren Godt houden.

3

^† Hare Vorsten zijn onder haer brullende Leeuwen, Ende hare Richters^* Woluen aenden Auont, die totten Morgen niet ouer en laten blijuen,

† Ezech. 22.a.6 Miche. 3.c.9.

* Abac. 1.b.8.

4

^† Haer Propheten zijn lichtueerdighe, ende Verachters. Hare Priesters ontwijen dat Heylichdom, ende bedieden de Wet vermetelijck.

† Iere. 23.b.14.

5

Maer de HEEre die onder haer is, leert wel recht, ende en doet niet quaets. Hi laet sine Rechten alle Morgen openbaerlijcken leeren, ende en laet niet af: Maer de boose lieden en willen haer niet leeren schamen.

6

Daerom wil ick dese lieden wtroeyen, hare Sloten verwoesten, ende hare straten soo ledich maken, datter niemant op gaen en sal. Hare steden sullen verdestrueert worden, datter niemant meer en woone.

7

⁺ Ick dede v seggen:^† My suldy vreesen, ende v laten castien, Soo en sal haer wooninghe niet wtgheroeyt worden, ende gheen van dien comen, daer icse mede besocht soude hebben, Maer si zijn neerstich alderley boosheydt te doen.

+ B vers 7

† 4.Esd. 16.g.68. Eccle. 12.c.11. Apoc. 14.b.7

8

Daerom (spreect de HEERE) so moet ghy oock wederom mijns verwachten, tot dat ick my op make tot zijnder tijt, dat ick oock rechten sal,^† ende de Heydenen vergaderen, ende de Conincrijcken te hoop brengen sal,^* mijnen toorne ouer haer te ghieten, Ia allen thoorne mijnder gramschappen.^† Want de geheele werelt sal door mijns ijuers vier verteert worden.

† Math. 25.c.32

* Nahu. 1.a.6.

† Seph. 1.c.18.

9

Als dan wil ic de volcken anders laten prediken met vriendelijcke lippen, Also dat si alle des HEEren^† Naem sullen aenroepen, ende hem eendrachtelijc dienen.

† Iohel 2.f.32. Acto. 2.b.21. Rom. 10.b.13.

10

Men sal my mijne aenbeders, te weten, de Verstroyde op gene zijde des waters, inder Morenlant, herwaerts brenghen tot een gheschencke.

11

⁺ Ter seluer tijt en sult ghy v niet meer schamen uwer wercken, waer mede ghy teghen my ouerghetreden hebt. Want ic wil de stoute Heylighen van v nemen. Also dat ghy v niet meer en sult verheffen, om mijns heylichs Berchs wille.

+ C vers 11

12

^† Ick wil v laten ouerblijuen een arm, slecht volck, die op des HEEren Naem betrouwen sullen.

† Esa. 41.b.14 Luce. 12.c.32.

13

^* De ouerghebleuen in Israel en sullen gheen boosheyt doen,^† noch lueghenen spreken, Ende men en sal in haren mont gheen bedriechlijcke tonge vinden. Maer si sullen weyden, ende rusten, sonder alle vreese.

* 1.Ioan. 3.b.9.

† Eph. 4.c.25

14

^* Iuycht ghy dochter Sion, Roept O Israel, verhuecht v,^† ende weest vrolijck, van gantscher herten, ghy dochter Ierusalem.

* Sach. 2.b.10. 9.b.9.

† 1.Tes. 5.b.16

15

Wandt de HEEre heeft v straffinghe wech ghenomen, ende uwe Vianden af ghekeert.^* De HEEre de Coninck Israels is by v,^† Alsoo dat ghi voor geen ongeluc meer sorgen en derft.

* Esaie. 43.a.5 2.Cor. 6.b.16

† Pro. 3.c.24.

16

Op die tijt salmen tot Ierusalem seggen:^* En veruaert v niet. Ende tot Sion: En laet uwe handen niet traech worden.

* Esa. 41.b.14 43.a.1. 54.a.4.

17

⁺ Wandt de HEEre v Godt is by v, een stercke Heylandt.^† Hy sal hem van v verblijden, ende v vriendelijck zijn, ende het dy vergheuen, Ende sal ouer v met gheschal vrolijck zijn.

+ D vers 17

† Esai. 62.a.5. 65.d.18.

18

De ghene, die door opstellingen gheplaecht waren, wil ick wech nemen, dat si van v comen, Welcke opstellingen haren last waren, daer si versmaetheydt af hadden.

19

Siet,^* ick wilt met allen den seluen een eynde maken, ter seluer tijt, die v quellen,^† Ende wil de hinckenden helpen, Ende de verstootene, vergaderen, ende wilse tot lof ende eere maken in alle Landen, daermense in veracht.

* Esai. 41.b.11. 51.b.7.

† Mic. 4.b.6.

20

Ter seluer tijt, wil ick v hier in brenghen, ende v ter seluer tijt vergaderen. Want ick wil v tot lof ende eere maken, onder alle volcken opter Aerden, Als ick uwe gheuanckenisse weynden sal, voor uwen oogen spreect de HEERE.

¶ Eynde des Propheets SephanIa.