Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Hy vermaentse tot gherechticheyt ende beteringhe, op dat si den toorne Godts ontulieden moghen. Hy vercondicht oock den Heydenen haer straffinghe.

1

⁺ VErgadert v, ende coemt herwaerts ghy verdrietelijck volck, eer dat oordeel wtgae,

+ A vers 1

2

Dat ghy als caf by dage wech vaert, eer den grammigen toorne des HEEren ouer v come, eer den dach der toorns des HEEren ouer v come.

3

^* Soect den HEEre, alle ghi allendige inden lande, ghy die sine rechten onderhout. Soeckt gherechticheydt, Soect ootmoedicheyt, op dat ghy inden daghe des toorns des HEEren moget verborghen worden.

* Esaie. 55.a.6. Amos. 5.a.6.

4

^† Want Gasa moet verlaten worden, ende Askalon woest worden. Asdod sal opten middaghe verdreuen worden, Ende Accaron wtghewortelt worden.

† Esaie. 15.a.1. Ezech. 25.c.15

5

Wee den ghenen, die aen de zee nederwaerts woonen, den Krijghers. Des HEEren woort sal ouer v comen. Ghy Canaan der Philisteen Lant, ic wil v vernielen, Also datter niemant meer woonen en sal.

6

Daer sullen aen de zee nederwaerts enckel Herders huysen, ende schaepskoyen zijn.

7

Ende dat selue sal den ouerghebleuenen vanden huyse Iuda te deele worden, dat si daer op weyden sullen.⁺ Des Auonts sullen si hen inde huysen Askalon legheren, wanneerse nv de HEEre hare Godt wederom besocht, ende hare gheuanckenisse gheweyndet heeft.

+ B vers 7

8

Ick heb de versmaetheyt,^† Moabs, ende de lasteringe der kinderen Ammon ghehoort, daer mede si mijn volck versmaet, ende haer van de selue lantpalen beroemt hebben.

† Esaie. 16.a.1. Iere. 48.a.1. Ezech. 25.b.8

9

Wel aen, Soo warachtelijck als ick leue, spreect de HEEre Sebaoth, de Godt Israels, Moab sal ghelijck^* Sodoma, ende de kinderen Ammon, ghelijck als Gomorra worden, Ia

* Gene. 19.e.24

[p. 89v]

ghelijc als eenen Netelstruyck ende soutgroeue, ende een eewighe woestijne. De ouerghebleuen mijns volcks sullense beroouen, Ende de ouerghebleuen mijns volcx sullense beeruen,

10

^† Dat sal haer ontmoeten voor hare hoouaerdie, om dat si des HEEren Sebaoths volck versmaet, ende haer beroemt hebben.

† Sacha. 2.b.8.

11

Verschrickelijck sal de HEEre ouer haer zijn,^* Want hy sal alle Goden opter Aerden vernielen.^† Ende alle Eylanden onder de Heydenen sullen hem aenbidden, een yeghelijck op zijnder plaetse.

* Esaie. 2.c.18.

† Apo. 15.b.4

12

⁺ Ende ghy Moren sult ooc door mijn sweert verslaghen worden.

+ C vers 12

13

Ende hy sal sine hant strecken ouer dat Noorden, Ende Assur vernielen.^* Niniue sal hy eenlijck maken ende dorre, ghelijck een woestijne,

* Tobi. 14.b.5. Nahu. 2.b.10. 3.b.7.

14

Also dat hen daer in legheren sullen alderley dieren onder de Heydenen. Oock sullender^* Roerdompen ende Egels op hare Thorens woonen, Ende sullen inde vensteren singhen, ende de Rauen op de Balcken. Wandt de Cederen berderen sullen afgheruct worden.

* Esai. 34.b.11.

15

Dat is de vrolijcke stadt, die so seker woonde, ende sprac in haerder herten:^† Ick bent, ende gheen meer. Hoe is si so woest gheworden? Dat de dieren daer in woonen, Ende soo wie daer voorby gaet, die^* fluytse aen, ende clapt metter hant ouer haer.

† 4.Re. 19.d.23 Esai. 47.b.8. Ezech. 28.a.2. 29.b.9. Apoca. 8.b.7.

* Pijptse.