Den Bibel, Inhoudende dat Oude ende Nieuwe Testament (Biestkensbijbel)

[p. 89r]

¶ De Propheet SephanIa.

¶ Dat eerste Capittel.

¶ Hy propheteert ouer Iuda, Ende voorseyt haer de toecomende straffinge.

1

⁺ DIt is dat woort des HEEren, welcke geschiet is tot SephanIa, den Sone Chusi, des Soons Gedalia, des Soons Amaria, des Soons Hiskia,^† Inder tijt Iosie des soons Amon, des Conincx Iuda.

+ A vers 1

† 4.Regum. 22. 23

2

Ick wil alle dinc wt den Lande wech nemen, seyt de HEEre.

3

Ic wil beyde de menschen ende beesten, beyde Voghelen des Hemels, ende Visschen inder zee wech nemen, met de arghernissen ende Godloosen. Ia ick wil de menschen wtroeyen wt den lande, seyt de HEERE.

4

Ick wil mijn handt wtstrecken ouer Iuda, ende ouer alle die tot Ierusalem woonen. Alsoo wil ick wat van Baal ouerghebleuen is wtroeyen, daer toe ooc de namen der^† Camarim ende Papen, wt dese plaetse,

† Ghewijder Papen.

5

^* Ende de ghene die des Hemels heyr op de daken aenbidden: Diet aenbidden,^‡ ende sweeren nochtans byden HEEre, Ende te ghelijck by Malchon:

* 4.Re. 21.a.3

‡ Deu. 10.d.20

6

Ende die vanden HEEre afuallen, Ende na den HEEre niet en vraghen, ende hem niet en achten.

7

^+* Weset stille, voor den HEERE HEEre,^† Wandt des HEEren dach is naby,^‡ Want de HEEre heeft eenen Slachoffer bereyt ghemaect, ende sine gasten daer toe ghenoot.

+ B vers 7

* Psal. 37.a.7. 46.b.11.

† Amo. 5.c.18.

‡ Eze. 39.d.17

8

Ende inden dage des Slachoffers des HEEren,^† wil ick versoecken, de Vorsten ende des Conincx kinderen, ende alle die een vreemt cleet draghen.

† 4.Reg. 25.a.1 Ierem. 39.b.5

9

Ick wil oock ter seluer tijt de ghene besoecken, die ouer den dorpel springhen, die haerder Heeren huys vullen met roof, ende bedriegherie.

10

Ter seluer tijt, seyt de HEERE, sal hem een luydt gheroep verheffen,^† vander Visschers poorte aen, ende een huylen van de andere poorte, Ende een groot iammer op de Hueuelen.

† Nehem. 3.a.3.

11

Huylet ghy die inde Muelene woont, want alle dat Cremers volck is wech, ende alle die ghelt vergaderen, zijn wtgheroeyt.

12

⁺ Ter seluer tijt wil ick Ierusalem met Lucernen doorsoecken, Ende wil besoecken de Lieden, die op haer heffen liggen,^* ende seggen in haren herten: De HEEre en sal noch goet noch quaet doen.

+ C vers 12

* Deut. 29.c.19. Ierem. 23.c.17

13

Ende haren goeden sullen tot eenen roof worden, ende hare huysen tot een woestijne.^† Sy sullen huysen timmeren, ende daer niet in woonen. Sy sullen Wijngaertackers planten, ende gheenen Wijn daer af drincken.

† Amos. 5.b.11. Deut. 28.c.30.

14

^* Want des HEEren grooten dach is naby, ende haest geheel seer.^† Als dat gheschrey vanden dach des HEEren comen sal, So sullen de stercke dan bitterlijck schreyen,

* Iere. 30.b.7. Amos. 5.c.18. Ioel. 2.a.1.

† 4.Esd. 2.d.27. Mat. 24.c.29 Apoca. 1.b.7.

15

Want desen dach is eenen dach der gramscap,^‡ eenen dach der droeffenisse ende des angsts, eenen dach des onweders ende tempeesten, Eenen dach der duysternisse, ende donckerheyt,^* Eenen dach der Wolcken ende des Neuels.

‡ Mal. 4.a.5.

* Iohelis. 2.a.2

16

Eenen dach der Basuynen ende Trompetten, tegen de vaste steden, ende hooghe Sloten.

17

^† Ic wil de Lieden so banghe maken, dat si rontom gaen sullen, ghelijc de blinden, Daerom dat si teghen den HEEre ghesondicht hebben. Haer bloet sal wtghestort worden ghelijck oft stof ware, ende haer Lijf, ghelijc oft dreck ware.

† Luce. 21.c.23.

18

^† Haer siluer ende gout en salse niet beschermen moghen inden dach der gramschappen des HEEren:^* Maer dat gantsche Lant sal doort vier zijns ijuers verteert worden. Want hy sal daer corts een eynde af maken, met alle den ghenen die inden Lande woonen.

† Eccle. 5.b.10. Prou. 10.a.2. 11.a.4. Ezech. 7.d.19

* Seph. 3.b.8