Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Een biddende vermaninge der Propheten, welcke op dat snaerspel ghemaeckt is, Inden welcken de grouwelijcke ende veruaerlijcke toecoemst des HEEren des strenghen Richters beschreuen wort.

1

⁺ DIt is dat ghebet des Propheeten Habacuc, voor de ontschuldighe.

+ A vers 1

2

HEERE ick hebbe v gherucht ghehoort, also dat ick my ontsette. HEERE ghy maect v werck leuendich midden inde Iaren, Ende ghy latet oock midden inde Iaren openbaer worden. Wanneerder droeffenisse voorhanden is, So ghedenct ghy der bermherticheyt.

3

^† Godt quam vant Suyden, Ende de Heylige vant gheberchte Paran Sela.

Sijns lofs was den Hemel vol,^* Ende zijnder eeren was de Aerde vol.

† Deute. 33.a.2. Iudic. 5.a.4.

* Esaie. 6.a.3.

4

Sijn^† claerheyt was ghelijck licht,^* stralen gingen van zijnen handen, Aldaer was heymelijck zijn macht.

† Exo. 24.c.10

* Psa. 18.b.15 Dani. 7.b.10.

5

Voor hem henen ghinck Pestilentie, Ende plaghe ghinck daer wt, waer hy henen tradt.

6

Hy stont, ende mat dat Lant, Hy sach toe, ende verstroyde de Heydenen, Dat de Berghen der werelt vermorselt werden, Ende dat haer de Hueuelen moeste buyghen inder werelt, doen hy inder werelt ghinck.

7

Ic sach der Mooren Hutten in moyte, Ende des Midianiten Tenten bedroeft.

8

En waert ghy niet toornich, HEERE inde wateruloet? Ende v gramschappe inde wateren, ende uwe verbolgentheyt inde See?

Doen ghy op uwe Peerden reet? Ende uwe Waghens den strijdt behielden?

9

Ghy toghet den boghe voorwaerts, ghelijck ghy den stammen ghesworen hadt, Sela. Ende deylde de waterstroomen int Lant.

10

^* De Berghen saghen v, ende haer wert banghe. De waterstroom stoof wech, De diepte liet haer hooren, De hoochte hief de handen op.

* Psalm. 18.a.8.

11

^+* Sonne ende Mane stonden stille,^† V pijlen voeren met stralen daer henen, ende dijn Spere met blincken des Blicxems.

+ B vers 11

* Iosue. 10.c.13.

† Psal. 18.b.15

12

^* Ghy vertradt dat Lant inder toornicheyt,, ende dorsschede de Heydenen in stucken in uwer verbolgentheyt.

* Iosue. 11.a.1.

13

Ghy toocht wt om v volc te helpen, om te helpen uwen Gesalfden.^† Ghy sloecht in stucken dat hooft int huys der godloosen, ende ontdecte de fundamenten tot aenden hals toe, Sela.

† Exo. 14.f.26. Iudit. 13.b.10.

14

Ghy woudt doch vloecken den Septer des hoofts, met zijne vlecken, Die ghelijck als een onweder comen om my te verstroyen, ende verblijden haer, recht oft sy den allendighen heymelijcken verslonden.

15

Vwe Peerden^† gaen inde See, inden modder der grooter wateren.

† Exo. 14.c.14

16

Dewijle ick sulcx hoore, soo is mijnen buyck bedroeft, ende mijne lippen beuen van dat ghecrijsch, Etter gaet in mijn ghebeente. Ick ben by my bedroeft, Ooch oft ick rusten mochte ter tijt des droefheyts, als wy henen op trecken totten volcke, dat ons bestrijdt.

17

⁺ Want den Vijgheboom en sal niet groenen, ende daer en sal gheen vrucht aen de Wijnstocken zijn. Den arbeyt aenden Olijfboom faelgeert, ende de Ackers en brengen geen^† neeringe. Ende de Schapen sullen wten Koyen geschuert worden, ende daer en sullen gheen Runderen inde stallen meer zijn.

+ C vers 17

† Voetssel.

18

^* Maer ick wil my verblijden inden HEERE,^‡ Ende vrolijck zijn in Gode mijn^† Heyl.

* 1.Regum. 2.a.1.

‡ Luc. 1.d.47

† Salicheyt.

19

^* Want de HEEre Heere is mijn cracht, ende sal mijne voeten maken ghelijck de voeten der Hirten.^† Ende sal my inde Hoochte voeren dat ick singhe op mijn snarenspel.

* Psa. 18.d.33. 27.a.1.

† Isai. 58.c.14

¶ Eynde des Propheten Habacuc.