Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Hy straft de ghierighe, onrechtuaerdighe, ende dronckaerts, met verachtinge der beelden, beeldemakers, ende die daer op betrouwen.

1

⁺ MAer den Wijn bedriecht den stouten man, dat hy niet gheblijuen en can. De welcke zijn Siele op sperret ghelijck de Helle,^* ende is recht als de doot, die niet te versaden en is,

+ A vers 1

* Prou. 30.b.16

2

Maer raept tot hem alle Heydenen, ende vergadert tot hem alle volcken. Maer wat geldet? De selue altesamen sullen een spruecke van hem maken, ende een schimpwoort ende spreecwoort, ende sullen seggen:^* Wee den genen die zijn goet vermeerdert, met vreent goet, Hoe lange salt dueren? Ende ladet slechs veel^† drecx op hem.

* Iere. 17.b.11.

† Slijms.

3

Och hoe onuersiens sullen si op waken, ende v bijten, ende ontwaken, die v wech stooten, ende ghi moet haer tot een deel worden.

4

^† Want ghy hebt veel Heydenen berooft, daerom sullen v wederom beroouen, alle de ouerghebleuen vanden volcken,^* om des bloets wille der menscen, ende om des ghewelts ende onrechts wille inden Lande, ende inder stadt, ende aen alle den genen, die daer in woonen, bedreuen.

† Abdie. 1.c.15. Esaie. 33.a.1.

* Abac. 3.b.12.

5

^* Wee den ghenen, die gierich is tot ongheluck zijns huys,^† op dat hy sinen nest inde Hoochte legge, op dat hy het ongheluck ontcome.

* Esaie. 5.b.8.

† Abdie. 1.a.4

6

Maer uwen raet sal tot schande ws huys gheraken. Want ghy hebt te veel volcken verslagen, ende hebt met alle moetwillicheyt ghesondicht.

7

^† Want de steenen inde mueren sullent oock roepen, ende de balcken aen dat gesperre sullen hen antwoorden.

† Luce. 19.d.40

[p. 88v]

8

^* Wee den ghenen, die de stadt met bloet bouwet, ende bereyt de stadt met onrecht.

* Ezech. 24.a.6 Nahum. 3.a.1. Michee. 3.c.10

9

Ist niet also, dattet vanden HEEre Sebaoth gheschieden sal? So wat de volcken v bearbeyt hebben, dat moet metten vyere verbernen. Ende daer de Lieden moede aen geworden zijn, dat moet verloren blijuen.

10

^‡ Want de Aerde sal vol worden van de kennisse der eeren des HEEREN, gelijck als water, dat de See bedect.

‡ Exodi. 9.c.16. Num. 14.c.21 Esaie. 11.b.9.

11

^† Wee v, die ghy uwen naesten inschencket, ende menghet uwe gramschappe daer onder, Ende hem droncken maket,^‡ op dat ghy zijn schaemte siet. Men sal v ooc versaden met schande voor eere, Daerom suypt ghy nv ooc, dat ghy tuymelt. Want den kelck inder rechter hant des HEEREN sal v omuangen, Ende moet schandelijcken spijen, voor uwe heerlijcheyt.

† Prou. 11.c.25.

‡ Genes. 9.d.22.

12

^* Want dat ghewelt ende onrecht aenden Libanon bedreuen, sal v oueruallen, Ende de verstoorde dieren sullen v veruaren,^† om der menschen bloets wille, ende om des ghewelts ende onrechts wille inden lande, ende inder stadt, ende aen alle den ghenen, die daer in woonen, bedreuen.

* Iere. 50.e.29. Abdie. 1.c.15.

† Abacuc. 3.a.4

13

Wat sal dan^† dat Beelt helpen, dat zijn meester ghesneden heeft? Ende dat valsche ghegoten Beelt, Waer op hem de meester verliet, om dat hy stomme Afgoden maeckte.

† Esa. 44.b.9. Ierem. 10.a.3.

14

^† Wee den genen, die tot een Hout spreeckt: Wort wacker, ende tot eenen stommen steen: Staet op. Hoe soudet^† gheleeren? Siet,^* Het is met gout ende siluer ouertoghen, ende daer en is gheenen Adem in hem.

† Sap. 13.d.17.

† Onderwijs gheuen.

* Ier. 10.a.4.

15

^† Maer de HEEre is in zijnen Heylighen Tempel, De gantsche werelt sy voor hem stille.

† Psal. 11.a.5.