Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Hy ontworpt ende schildert ons de grouwelijcke straffingen voor onsen ooghen.

1

⁺ DE Verstroyer sal tegen v op trecken, ende de Stercte belegeren. Maer, berent Ia de straten wel, wapent v opt alder beste, ende sterckt v opt alder gheweldichste.

+ A vers 1

2

Want de HEEre sal de hoouaerdie Iacobs verghelden, ghelijck de hoouaerdie Israels. Want de Afpluckers sullense afplucken, ende hare Wijnrijsen verderuen.

[p. 87v]

3

De Schilden zijnder stercken zijn root, Sijn heyruolck siet ghelijc als Purpur. Sijn Waghens lichten ghelijc vier, als hy treffen wil. Haer Spiessen beuen.

4

De Waghens rollen op de straten. ende ratelen op de weghen. Haer aensien is ghelijck Fackelen, ende si varen door malcanderen, ghelijck den Blicxem.

5

Maer hy sal op sine gheweldige dencken, nochtans sullen de selue vallen, werwaerts si wt willen. Ende si sullen haesten nae de mueren, ende nae een beschudsel daer si seker zijn.

6

Maer de poorten aent water sullen nochtans geopent worden, Ende dat Palleys sal vergaen.

7

De Coninghinne sal geuangen wech gheuoert worden, Ende hare Dienstiofferen sullen suchten ghelijc de duyuen, ende voor hare borsten slaen.

8

Want Niniue is ghelijck een water gracht, vol waters, maer dat selue sal veruloeyen moeten. Staet, Staet [sullen si roepen] Mer niemant en sal hem om keeren.

9

⁺ Daerom rooft nv siluer, rooft gout,^* Wandt hier en is der schatten gheen eynde, Ende de menichte aller costelijcker Cleynodien.

+ B vers 9

* Esaie. 2.a.7.

10

Maer nv moetse reyn af ghelesen ende wtghepocht worden. Also dat haer herte moet versaghen, de knien wanckelen, alle lendenen beuen, ende alle aensichten bleeck sien,^* ghelijck eene siepot.

* Ierem. 1.b.13.

11

Waer is nv de wooninge der Leeuwen, ende de weyde der Iongher Leeuwen, daer de Leeuwe ende de Leeuwinne metten Ionghen wandelden, ende datse niemandt en dorste veriaghen?

12

Maer de Leeuwe roofde ghenoech voor zijne Ionghen, ende verworchde sinen Leeuwinnen. Sijn holen veruulde hy met roof, ende sine wooninghe met dien, dat hy verschuert hadde.

13

Siet, Ic wil aen v, spreect de HEERE Sebaoth, ende uwe Waghens inden roocke aensteken, Ende dat sweert sal uwe Ionghe Leeuwen verslinden, Ende ic wil ws roouens een eynde maken opter Aerden, datmen uwer boden stemme niet meer hooren en sal.