Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Hy straft de lasteringe der booser stadt, Ende hy vercondicht haer hare straffinghe.

1

⁺ VVee^† der moordadigher stadt, die vol lueghenen ende roouerie is, ende van haren roouen niet aflaten en wil.

+ A vers 1

† Ezec. 24.a.6. Abac. 3.b.8. Mich. 3.c.10.

2

Wandt daer salmen de sweepen hooren clappen, ende de Raders ratelen, de Peerden briesschen, ende de Wagens rollen.

3

Hy brengt Ruyters op met blinckende sweerden, ende met glinsterende Spiessen. Daer ligghen veel verslaghene, ende groote hoopen lichamen, Alsoo dat der seluer gheen ghetal en is, Iae datmen ouer haer lichamen vallen moet.

4

Ende dat al om der grooter hoererijen wille, der schoonder lieuer Hoeren, Die met toouerie omgaet,^* die met haerder hoererie de Heydenen, ende met haerder Toouerien, landen ende lieden verworuen heeft.

* Apoca. 17. 18.

5

Siet, ick wil aen v, spreect de HEERE Sebaoth,^* Ick wil v uwe belegsel ontdecken onder v aensicht, ende wil de Heydenen v blootheyt, ende den Conenckrijcken uwe schande wijsen.

* Esai. 47.a.3. Ezec. 16.b.37.

6

⁺ Ick wil v gansch grouwelijck maken, ende v scheynden, ende een afschouwinghe van v maken.

+ B vers 6

7

Also dat alle die v sien, van v vlieden, ende segghen sullen:^† Niniue is verdestrueert, Wie wil medelijden met haer hebben? Ende waer sal ick v Troosters soecken?

† Tob. 14.b.5. Soph. 2.c.13.

8

Meynt ghy dat ghy beter zijt dan de Stadt No der Regenten? Die daer lach aen de wateren, ende rontsom water hadde, Welcker mueren ende Vesten, de See was.

9

Morenlant ende Egipten was haer ontellijcke macht. Put ende Libia waren uwe hulpe:

10

Nochtans heeftse verdreuen moeten worden, ende geuanghen wech trecken, ende hare kinderen zijn op alle straten verslaghen, ende om hare Eedelen wierpmen dat Lot, Ende alle hare gheweldighe werden in ketenen ende boeyen gheleyt.

11

Alsoo moet ghy oock droncken worden, ende v verberghen, ende een vasticheyt soecken voor den Viant.

12

Alle uwe vaste steden, zijn ghelijck Vijgheboomen met rijpe Vijghen, alsmense schudt, datse dien inden mondt vallen, diese eten wil.

13

Siet, dijn volck sal tot Wijuen worden in v, Ende de poorten ws Lants sullen uwen Vianden gheopent worden, Ende dat vyer sal uwe grendelen verteren.

14

⁺ Schept v water, want ghy sult belegert worden, betert uwe stercten, gaet in dat leem, ende tredet dat, ende maeckt stercke tichelsteenen.

+ C vers 14

15

^* Maer dat vyer sal v verteren, ende dat sweert dooden. Het sal v verslinden, ghelijck de^† Keuers. Het sal v oueruallen als Keuers. Het sal v oueruallen, ghelijck Sprinchanen.

* Esaie. 30.f.30. 31.b.8. Sacha. 11.a.1

† Cruytwormen.

16

Ghy hebt meer hanteerdeers, dan der Sterren aenden Hemel zijn, Maer nv sullen si haer wt breyden ghelijck Keuers, ende daer af vliegen.

17

Vwer Heeren isser soo veel, als der Sprinchanen, ende uwer Hooftlieden als der Keuers, die haer aen de Thuynen legeren, inde coude daghen, Maer als de Sonne opgaet, so schicken sy haer wech, datmen niet en weet, waer sy blijuen.

18

Vwe herders sullen slapen, O Coninck tot Assur, Vwe Machtige sullen hen legghen, Ende v volck sal op de Bergen verstroyt zijn, ende niemant en salse vergaderen.

19

Niemant en sal om uwe schade trueren, noch hem om uwer plaghen wille becommeren. Maer alle die sulcx van v hooren, sullen met hare handen ouer v clappen. Want ouer wien is uwe boosheyt, sonder ophouden, niet gegaen?

¶Eynde des Propheets Nahum.