Den Bibel, Inhoudende dat Oude ende Nieuwe Testament (Biestkensbijbel)

¶ De Propheet Nahum.

Dat eerste Capittel.

¶ Hy loeft ende prijst de macht ende cracht Gods, Ende hy bewijst oock zijn goedertierenheyt. Hy straft de Niniuiten, om dat sy Gods raedt ende straffinge verachten.

1

⁺ DIt is den last ouer Niniue, ende dat boeck der Prophetien Nahums van Elkos.

+ A vers 1

2

^* De HEEre is een ijuerich Godt, ende een^† Wreker. Ia een Wreker is de HEEre ende toornich. De HEEre is een Wreker tegen zijne teghenpartijders, ende diet zijnen vianden niet vergeten en sal.

* Deute. 5.b.9.

† Deu. 32.e.35.

3

^* De HEERE is verduldich ende van grooter cracht,^† voor welcken niemant onschuldich en is. Hy is de HEERE, wiens wegen int onweder inde inde tempeeste zijn, ende onder zijn voeten dicke stof.

* Rom. 2.a.4.

† Psal. 143.a.2. Iob. 4.b.17. 25.a.4. Eccles. 7.c.21.

4

Die de See berispt^‡ ende drooghe maect, ende alle water verdroocht. Basan ende Carmel versmachten, ende soo wat daer op den berch Libanon bloeyt, dat verdorret.

‡ Exo. 14.e.21

5

^† De berghen beuen voor hem, ende den hueuelen is banghe.^* Dat Aertrijck beeft voor hem, daer toe den geheelen omloop des werelts, ende alle die daer in woonen.

† Psalm. 18.a.8 4.Es. 16.a.12.

* Ier. 10.b.10.

6

^† Wie can voor zijnen thoorne bestaen? Ende wie can voor zijne gramschap geblijuen? Sijnen thoorne bernt ghelijc vyer, ende de steenrootsen springen in stucken voor hem.

† Esa. 34.a.2. Abac. 4.a.5. Soph. 3.b.8.

7

⁺ De HEERE is goedertieren,^* ende een vasticheyt, inder tijt der noot, Ende kent de ghene, die op hem^† betrouwen.

+ B vers 7

* Ioeli. 3.c.16.

† Psal. 2.b.12. Iere. 17.b.7.

8

Wanneer de wateruloet ouerloopt, so maect hy dies met haer een eynde: Maer zijne vianden veruolcht hy^‡ met duysternisse.

‡ Exo. 10.e.21.

9

Wat versiert ghy teghen den HEERE? Hy sal dies doch een eynde maken. Dat ongeluc en sal niet tweemael comen.

10

Want ghelijck als wanner de doornen, die noch door malcanderen wassen ende dat beste sap hebben, verbrandt worden, gelijc dorre stroo.

11

^† Also sal zijn des Schalcx raedt, die van v coemt, ende yet quaets teghen den HEEre versiert.

† Psal. 33.b.10. Esaie. 8.a.2. 19.c.11.

12

Also spreect de HEEre: Laetse comen so ghewapent ende machtich als sy willen, Soo sullen sy nochtans ter neder ghehouwen worden, ende wech varen. Ick hebbe v verootmoedicht, maer ick en wil v niet wederom verootmoedighen.

13

Maer als dan wil ick zijn iock, dat ghy draecht, in stucken breken, ende dijne banden verschueren.

14

Maer tegen v heeft de HEERE gheboden, dat dijns naems saet niet meer blijuen en sal. Vanden huyse ws Gods wil ick v wtroyen.^* De Afgoden ende Beelden wil ick v tot eenen gracht maken, want ghy zijt te niete gheworden.

* Miche. 5.c.12.

15

^† Siet, op de berghen comen voeten eens goeden bode, die daer vrede predickt. Houdt dijne vierdaghen Iuda,^* ende betaelt uwe gheloeften. Want de schalck en sal niet meer ouer v comen, Hy is gheheel wtgeroyt.

† Esaie. 33.a.7. 52.b.7. Rom. 10.c.15.

* Ps. 50.b.14