Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

Een corte summa der voorseyder dingen in den welcken hy met een schoone ghelikenisse dat cleyne ghetal der gheloouigher bewijst.

1

⁺ OCh, Het ghaet my als eenen die in den wijnberch na leest, daermen gheen druyuen en vindt te eten, ende wilde nochtans gheerne de beste vruchten hebben.

+ A vers 1

2

De oprechte lieden zijn wech in desen lande,^† ende de Rehtuaerdighe en zijn niet meer onder de lieden. Sy dencken slechs om bloet te storten, Een yeghelijc iaecht den anderen, op dat hy hem verderue, ende meynen, sy doen daer wel aen, als sy quaet doen.

† Rom. 3.b.10.

3

Soo wat de Vorst wil, dat spreect de Rechter, op dat hy hem weder eenen dienst doen soude. De gheweldige raden na hare moetwillicheyt, schade te doen, ende sy draeyent soo sy willen.

4

De alderbeste onder haer is ghelijck doornen, ende de alder redelijckste, ghelijck dijstel. Maer als den dach uwer Predicanten comen sal, als ghy besocht sult worden, dan en sullen sy niet weten waer henen.

5

Niemant en ghelooue zijnen naesten, Niemant en verlate hem op de Vorsten. Bewaert de duere dijns monts, voor de ghene, die in uwe armen slaept.

6

^† Want de soon veracht den vader, de dochter set haer teghen de moeder, des soons wijf, is teghen haers Mans moeder, ende des menschen vianden zijn, zijn eyghen huysghesin.

† Mat. 10.c.35. Deut. 13.b.6. 33.b.9. Psal. 38.b.12. 55.b.14. 88.a.9.

7

⁺ Maer ick wil op den HEEre sien, ende des Gods mijns Heyls verwachten, Mijn Godt sal my verhooren.

+ B vers 7

8

^† En verblijt v niet mijn viandinne, om dat ick ter neder ligghe. Ick sal weder op comen. Ende al sit ick inder duysternisse,^† so is nochtans de HEERE mijn Licht.

† Prou. 17.a.5. 24.c.17.

† Psal. 27.a.1.

9

Ick wil des HEEREN toorne dragen, want ic heb tegen hem gesondicht, tot dat hy mijn sake wtuoere, ende my recht doe. Hy sal my aent licht brenghen, op dat ick mijnen lust aen zijnder ghenade sie.

10

Mijne viandinne salt moeten sien, ende met schande blijuen, die nv tot my spreeckt:⁺ Waer is de HEERE dijn Godt? Mijn ooghen sullent sien, dat sy dan ghelijck als dreck opter streten vertreden sal worden.

+ 4.Re. 19.c.35.

[p. 87r]

11

Op die tijt,^† sullen uwe mueren op getimmert worden, ende Gods woordt sal wijt wtcomen.

† Amos. 9.c.11.

12

Ende ter seluer tijt sullen sy van Assur, ende van den vasten steden tot v comen, van de vaste steden, al tot dat water toe, vander eender zee totter ander, van dat een gheberchte tot dat ander.

13

Want dat Lant van wegen zijnder inwoonders sal woest zijn, om der vruchten wille haerder wercken.

14

Daerom^† so weydt ghy nv dijn volc met dijnen^* stock, de cudde ws erfdeels, die daer woonen beyde in de wildernisse alleene, ende op dat velt. Laetse tot Basan ende Gilead weyden, gelijck als van oudts herwaerts.

† Actu 20.c.28. 1.Petr. 5.a 2.

* Psa. 23.a.4

15

⁺ Ick wil haer wonderlijcke dinghen laten sien, gelijc als ter tijdt, doen sy wt Egipten lant togen.

+ C vers 15

16

Dwelcke de Heydenen sien, ende alle hare geweldige hen schamen sullen,^‡ ende de hant op haren mont leggen, ende hare ooren toe houden.

‡ Iob. 39.d.37.

17

Sy sullen^† stof lecken gelijck de slangen, ende ghelijck dat ghewormte opter Aerden, sullen sy beuen in haren holen. Sy sullen haer vreesen voor den HEEre onsen Godt, ende haer voor v ontsetten.

† Genes. 3.c.14.

18

^* Waer is alsulcken Godt, gelijc ghy zijt?^† Die de sonden vergeeft, ende schelt quijt de misdaet, den ouergebleuenen zijns eerfdeels.^‡ Die zijnen toorne niet eewelijck en behout, want hy is bermhertich.

* Ierem. 10.a.6

† Collo. 2.b.13

‡ Psal. 30.a.6.

19

^* Hy sal onser weder ontfermen, onse misdaet dempen, ende alle onse sonden inde diepte der See werpen.

* Iere. 9.d.23. Esai. 54.b.8.

20

Ghy sult den Iacob de trouwe, ende Abraham de genade houden,^* Gelijc ghy onsen voorvaderen van oudts herwaerts gesworen hebt.

* Gene. 22.c.16 Luce. 1.e.51.

¶ Eynde des Propheets Micha.