Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Een ander straffinghe ende berispinghe, De lichamelike offerhanden worden verstooten, ende de gheestelijcke ende aenghename vertoont.

1

⁺ HOort doch, wat de HEERE seyt:^† Maket v op, ende berispt de berghen ende laet de hueuelen dijn stemme hooren.

+ A vers 1

† Esai. 58.a.1.

2

Hoort ghy berghen, hoe dat de HEERE straffen wil, tsamen met de stercke fundamenten der Aerden. Want de HEERE wil zijn volck berispen, ende wil Israel straffen.

3

^† Wat hebbe ick v ghedaen, mijn volck? Ende waermede heb ick v hinderlijck gheweest? Dat segt my.

† Ierem. 2.a.2.

4

^* Ick heb v doch wt den lande Egypti gheleyt, ende wt den diensthuyse verlost, ende voor v gesonden^† Mosen, Aaron ende MirIam.

* Exo. 14.e.21.

† Num. 12.a.1.

5

O mijn volck, weest doch ghedachtich,^* wat Balak de Coninck in Moab inden sin hadde, ende wat Bilaem de sone Beor hem antwoorde, van Sittim aen al tot Gilgal toe, Waer aen ghy ymmers mercken sout, dat v de HEERE alle goet ghedaen heeft.

* Num. 22. 23. 24. 25.

6

^+* Waer mede sal ick den HEERE versoenen? Met neygen voor den hoogen Godt? Sal ick hem met brantofferen ende iarige calueren versoenen?

+ B vers 6

* Psal. 116.c.12.

7

Meyndy,^* dat de HEEre een behaghen heeft aen veel duysent rammen, oft aen olie, ofter dies alschoon ontallijcke stroomen vol waren? Oft sal ick mijnen yersten soon voor mijn ouertredinge geuen? Oft mijns lichaems vrucht voor de sonde mijnder sielen?

* 1.Reg. 15.d.22 Esai. 1.b.11. Iere. 7.c.20. Math. 9.b.13.

8

Het is v geseyt, Mensche wat goet is,^† ende wat de HEERE van v eyscht, te weten, Gods woort houden, ende liefde oeffenen^* ende ootmoedich zijn voor dijnen Godt.

† Deut. 10.c.13.

* 1.Pet. 5.a.6.

9

Des HEEREN stemme sal ouer de stadt roepen:^† Maer wie dijnen Name vreest, dien salt ghelucken. Hoort ghy Stammen, watter gepredict wort.

† Malac. 4.a.2

10

Noch blijfter onrechtuaerdich goet in den huyse des godloosen,^‡ ende dat behaette cleyne Epha.

‡ Leui. 19.g.35. Deu. 25.c.13. Pro. 20.b.10. Ezec. 45.b.10

11

Oft soude ick de onrechte wage, ende valsche gewichte inden Sickel^* billiken?

* Voor recht houden.

12

Door dewelcke hare rijcke veel onrechts doen, ende hare Inwoonders gaen met luegenen om, ende hebben valsche tonghen in haren hals.

13

Daeromme wil ick v oock beghinnen te plagen, ende v om uwer sonden wille woest maken.

14

^† Ghy en sult niet ge-noech te eten hebben, ende sult versmachten. Ende wat ghy aengrijpt, dat en sal doch niet daer af comen. Ende wat daer af coemt, dat wil ick doch den sweerde ouer leueren.

† Le. 26.d.26. Hos. 4.b.10. Hagge. 1.a.6.

15

Ghy sult sayen, ende niet maeyen. Ghy sult olie perssen, ende v met de selue niet saluen, Ende most perssen, ende gheenen wijn drincken.

16

^† Want met hout de^* wijse Amri, ende alle wercken des huys Ahabs, ende volget haren raedt. Daeromme wil ick v tot eender woestijnen maken, ende hare inwoonders, datmense^* aenfluyten sal, ende sult mijns volcx versmaetheyt draghen.

† 3.Reg. 16.c.23

* Gods dienst.

* aenpijpen.