Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Hy propheteert van de salicheyt die Godt door zijnen soon bewijsen wil. Ende van dat rijcke dat sy door Christum vercrijgen sullen.

1

⁺ MAer^† in de laetste daghen sal den berch, daer des HEEren huys op staet, bereydet zijn, hooger dan alle bergen, ende bouen de hueuelen verheuen zijn. Ende de volcken sullen daer toe loopen,

+ A vers 1

† Leu. 26.g.46 Esaie. 2.a.2.

2

Ende vele Heydenen sullen gaen, ende segghen:^† Coemt, laet ons op totten berge der HEEren gaen, ende totten huyse des Gods Iacobs, op dat hy ons sine weghen leere, ende wy op zijne straten wandelen.^* Want van Sion sal de Wet wtgaen, Ende des HEEren woort van Ierusalem.

† Sach. 8.d.21.

* Psal. 50.a.2. Actuum. 1.a.8.

3

Hy sal onder groote volcken dat recht wtspreken, ende vele Heydenen straffen in verre Landen.^‡ Sy sullen hare sweerden tot ploechijsers, ende hare spiessen tot sickelen maken.^+† Gheen volck en sal tegen dat ander een sweert opheffen, ende sy en sullen niet meer leeren oorloghen

‡ Esaie 2.a.4.

+ B vers 3

† Esai. 11.b.6. 65.d.24.

4

Een yegelijc sal onder zijnen wijngaertstock ende vijgheboom woonen sonder veruaertheyt. Want de mont des HEEREN Sebaoth heuet ghesproken.

5

Want een yegelijc volck sal wandelen inden Name zijns Gods: Maer wy sullen wandelen inden Name des HEEREN onses Gods, altijt ende eewelijc.

6

Ter seluer tijt, spreect de^† HEEre, wil ick de^* lamme vergaderen, ende de verstootene te hoope brengen, ende die ick geplaecht hebbe.

† Soph. 3.d.19.

* Cruepele.

7

Ende ick wil de lamme maken, dat sy erfghename hebben sal, ende de verstootene tot eenen grooten volcke maken. Ende de HEEre sal Coninc ouer haer zijn, opten berch Sion, van nv aen tot inder eewicheyt.

8

Ende ghy Toren^† Eder, een stercte der dochter Sion, Dijn gulden roose sal comen, de voorledene heerschappie, dat Coninckrijc der dochter Ierusalems.

† Gene. 35.d.21.

9

Waerom hangt ghy v dan aen andere vrienden? En is de Coninck niet by v? Ende zijn uwe Raetgeuers alle wech?^† Dat v dat wee also aen ghecomen is, als eender in kints noode?

† Esaie. 26.c.17 Ioan. 16.c.21.

10

⁺ Lieue, lijdt doch sulcken arbeyt, ende steent ghy dochter Sion, ghelijck een in kints noode. Want ghy moet, tis waer, henen ter stadt wt, ende opten velde woonen, ende tot Babel comen,^* Maer nochtans suldy van daer weder verlost worden, aldaer sal v de HEERE van uwe vianden verlossen.

+ C vers 10

* Mich. 5.b.5.

11

Wandt vele Heydenen sullen haer schier teghen v vergaderen, ende segghen: Sy is verbannen, wy willen onsen lust aen Sion sien.

12

^* Maer si en weten des HEEREN ghedachten niet, ende si en mercken sinen raet niet, dat hise te hoope ghebracht heeft, ghelijck als schoouen inder schueren.

* Esai. 14.d.22

13

Daerom maect v op, ende dorscht ghy dochter Sion, want ick wil v ijseren hoornen ende metalen clauwen maken, ende sult vele volcken vermorselen. Ende ick wil den HEEre haer goet verbannen, ende hare haue den Heerschapper der gheheelder Werelt.

14

Maer ghi Crijgerinne, wapent v, wantmen sal ons beleggen, ende den Rechter Israels metten Roede op de kinnebacken slaen.