Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Hy straft de Ouerheeren de Predicanten, om der welcker wille dat volck in lijden ende verdriet coemt.

1

⁺ ENde ick sprack: Hoort doch ghy hoofden inden huyse Iocobs, ende ghy Vorsten inden huyse Israels.^† Ghy soudet billicx zijn die ghene die dat recht wisten,

+ A vers 1

† Deut. 17.d.23. Ieremi. 5.a.5.

2

^* Maer ghy haet dat goet, ende hebt lief dat quaet. Ghy vilt haer de huyt af, ende dat vleesche van haren beenen, ende ghy verslint dat vleesch mijns volcx.

* Esai. 5.c.20.

3

Ende als ghy haer de huyt af ghetoghen hebt, so breect ghy haer de beenen oock, ende legget van den anderen, ghelijck als in eenen pot, ende ghelijck vleesch in eenen ketel.

4

^† Daeromme als ghy nv totten HEERE roepen sult, soo en sal hy v niet verhooren,^* Maer hy sal zijn aensicht voor v verbergen, ter seluer tijt, ghelijck ghy met uwe boose wesen verdient hebt.

† Esai. 1.b.15. Ezechi. 8.c.18. 1.Petr. 3.b.12. Proue. 1.c.28. 4.Esd. 1.c.26.

* Esaie. 64.d..20.

5

⁺ Also spreect de Heere teghen de Propheten, die mijn volck verleyden: Sy prediken, tsal wel toe gaen,^‡ alsmen haer te eten gheeft, Maer alsmen haer niet inden mont en geeft, so prediken sy, daer moet een oorloge comen.

+ B vers 5

‡ Eze. 13.d.19. Esai. 5.c.23.

6

^† Daerom sal uwe gesichte tot eender nacht, ende uwe waersegghen tot eender duysternisse worden.^* De Sonne sal ouer de Propheten ondergaen, ende den dach ouer haer duyster worden.

† Deu. 28.c.28

* Sapie. 5.a.6. Mala. 4.a.2.

7

Ende de sienders sullen tot schanden, ende de Waerseggers tot spot worden. Ende moeten haren mont altemale^† toewinden, dewijle datter gheen Gods woort zijn en sal.

† Bemompelen

8

^‡ Maer ick ben vol crachten ende gheests des HEEREN, vol rechts ende sterckheyt, also dat ick Iacob zijne ouertredinghe, ende Israel zijne sonden vercondighen derf.

‡ Ierem. 1.c.18. Ezech. 2.b.18.

9

⁺ Daerom hoort doch dit, O ghy hoofden inden huyse Iacobs, ende ghy Vor-

+ C vers 9

[p. 86r]

sten inden huyse Israels, ghy die dat recht versmaet, ende al dat oprecht is, verkeert,

10

^* Ghy die Sion met bloedt timmert, ende Ierusalem met onrecht.

* Nahum. 3.a.1. Ezec. 24.a.6.

11

Hare hoofden,^† richten om^‡ gheschencken, hare Priesters leeren om loon, ende hare Propheten waersegghen om ghelt. Sy verlaten haer op den HEERE ende seggen: En is de HEERE niet onder ons?^* Daer en can geen ongeluc ouer ons gecomen.

† Gheuen vonnisse

‡ Deut. 17.a.2 Exodi. 23.a.8.

* Miche. 2.b.6.

12

^† Daerom sal Sion om uwen twille ghelijck een velt gheploecht,^* Ende Ierusalem tot eenen steenhope, ende den Berch des Tempels tot eender wilder hoochte worden.

† Ier. 26.d.18.

* Iere. 9.b.11. 3.Reg. 9..b.8. Luc. 19.d.44 21.a.5.