Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Hy noemt hare boosheden ende lasteringen, ende straftse daerom ooc, te weten, afual van Godt, ontrouwe, valscheyt, verualschinghe des rechts, ende vermetelijc ghewelt.

1

⁺ VVe den ghenen^† die daer dencken op schade te doen, Ende gaen met boose stucken om op haren Leger, op dat zijt vroech alst licht wort, volbrenghen, dewijle sy de macht hebben.

+ A vers 1

† 3.Mac. r.146.

2

^† Sy trecken Ackers tot haer, Ende nemen huysen, welcke sy slechs willen. Alsoo bedrijuen sy ghewelt met eens yeghelijcx huys, ende met een yeghelijcx erfgoet.

† 3.Reg. 21.a.3.

3

Daerom spreeckt de HEEre allsoo: Siet, ick dencke wat quaets ouer dit gheslacht, daer ghy uwen hals niet wttrecken, ende soo stoudt niet gaen en sult,^† want het sal eenen boosen tijt zijn.

† Amos. 5.b.13.

4

Op den seluen tijt salmen een Spruecke van v maken, ende clagen. Het is wt salmen seggenwy zijn verdestrueert, Dat Lant mijns volcks crijcht eene vreemden Heere.

5

Wanneer sal hy ons de ackers weder toe deylen, die hy ons genomen heeft?⁺ Ia wel, ghy en sult geen deel behouden in de Ghemeynte des HEEREN.

+ B vers 5

6

Sy seggen: Men en soude niet^† druypen. Want alsulcken druypen en ghaet ons niet aen. Wy^† en sullen soo niet tot schande comen.

† Dat is predicken.

† Miche. 3.c.11.

7

Dat huys Iacobs troost hem also, Meyndy dat des HEEREN Geest vercort sy? Soude hy sulcx doen willen?

8

Het is waer, mijne woorden zijn vriendelijcken den oprechten, maer mijn volck heeft hem opghemaect als eenen viant, Want sy roouen beyde rock ende mantel, den ghenen, die sonder achterdencken gaen, ghelijck als de ghene die wt den crijch comen.

9

Ghy drijft de wijuen mijns volcx wt hare lieflijcke huysen, Ende ghy neemt sonder ophouden mijn cieraet van haren iongen kinderen.

10

Daerom maect v op, ghy moet wech, Ghy en sult hier niet blijuen. Om haerder onreynicheyt wille, moeten sy rouweliken verstoort worden.

11

⁺ Waer ick een dwalende gheest, ende een luegenprediker, ende predicte,^† hoe sy suypen ende swelghen souden: Dat waer een prediker voor dit volck.

+ C vers 11

† Esaie. 5.b.11. 16.c.12.

12

Maer ick wil v Iacob gansch vergaderen, ende de ouergebleuen in Israel te hoope brengen,^* Ick wilse ghelijc een cudde tsamen in eenen vasten stal brengen, ende ghelijck als een cudde in zijne koye, dattet van menschen^* duenen sal.

* Ioan. 10.b.16.

* Rommelen.

13

Een doorbreker sal voor haer opuaren, sy sullen doorbreken, ende ter poorten wt ende in trecken. Ende hare Coninck sal voor haer henen gaen, Ende de HEEre vooraen.