Den Bibel, Inhoudende dat Oude ende Nieuwe Testament (Biestkensbijbel)

¶ De Propheet Micha.

¶ Dat eerste Capittel.

¶ Hy berispt dat volck Israels ende Iuda, om haerder boosheyt ende afgoderie, Hy voorseyt haer de straffinge met een clage.

1

⁺ DIt is dat woort des HEEren, dwelck gheschiede tot Micha van Maresa, inder tijt^† Iotham,^* Ahas ende^‡ Iehiskia, der Coningen Iuda, dwelck hy ghesien heeft ouer Samaria ende Ierusalem.

+ A vers 1

† 4.Reg. 15.a.5 2.Par. 27.a.1.

* 4.Reg. 16.a.1.

‡ 4.Regum. 18.a.1. 19.a.1.

2

^* Hoort alle volcken, Merct op Lant, ende al wat daer in is. Want God de HEEre heeft met v te spreken, Ia de HEEre wt sinen heyligen Tempel.

* Deut. 32.a.1. Esaie. 1.a.2.

3

Want^† siet, de HEEre sal wtgaen van zijnder plaetse, ende af varen, ende treden op de hoochten inden Lande,

† Esai. 26.c.21.

4

Dat de Berghen onder hem versmelten, ende de dalen van malcanderen splijten sullen, ghelijck als wachs vanden vyere smelt, ghelijck de wateren die onderwaerts vlieten.

5

^+† Ende dit alle om de ouertredinghe wille Iacobs, ende om der sonden wille des huys Israels. Welcke is de ouertredinghe Iacobs?^† En ist Samaria niet? Welcke zijn de Hoochten Iuda?^* En ist Ierusalem niet?

+ B vers 5

† Amos. 2.a.1.

† 3.Reg. 12.d.28

* 3.Reg. 11.a.7. 4.Re. 16.a.3. 21.a.3.

6

Ende ick wil Samaria tot eenen^† steenhoope inden velde maken, die men om de wijngaert ackers leyt, Ende wil hare steenen int dal sleypen, ende te gronde af breken.

† Esai. 25.a.2. 26.a.5. Iere. 9.b.11.

7

Alle hare Afgoden sullen in stucken ghebroken, ende alle haren hoerenloon sal metten vyere verbrant worden, Ende ick wil alle hare Beelden verwoesten.^† Want sy zijn van hoeren loon vergadert, Ende sullen oock weder hoeren loon worden.

† Deut. 23.c.17.

[p. 85v]

8

Daerom moet ic clagen ende huylen, Ick moet berooft ende bloot gaen. Ick moet claghen als de draken, ende trueren als de Struyssen.

9

Want haerder plagen en is gheenen raet, die tot Iuda toe gecomen is, ende al tot mijns volcx poorte tot Ierusalem toe reycken sal.

10

En vercondighet ymmers tot Gad niet, En laet v niet hooren weenen. Maer gaet in de truercamer, ende settet v in de asschen.

11

Du schoone stadt, moet ter neder met alle schande. De inwoonersche Saenan en sal niet wt trecken, om des Rous wille des naesten huys. Hy salt van v nemen, als hy hem daer legeren sal.

12

De bedroefde Stadt en heeft geen macht om haer seluen te troosten, want dat ongheluc sal vanden HEEre comen, oock al tot aen de poorten Ierusalems.

13

Ghy stadt Lachis, spant^† loopers aen, ende vaert wech, want ghy zijt der dochter Sion dat^* beginsel ter sonden, ende in v zijn gheuonden de ouertredingen Israels.

† Postpeerden.

* De oorsake.

14

Ghy sult geuangenen moeten wtgeuen, soo wel als Gad. Der Stadt Achsib salt metten Coningen Israels faelgeren.

15

Ick wil v Maresa den rechten Erfghenaem brengen, Ende de heerlijckheyt Israels sal comen al tot Adullam toe.

16

Laet dat haeyr afscheeren, ende gaet caluwe, ouer dijne^† teere kinderen. Maeckt v gheheel caluwe, ghelijck als eenen Arent, Want sy zijn van v gheuanghen wech gheuoert.

† Verwende.