Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Ionas wordt toornich, hy claecht ouer Godt, die onderwijst ende straft hem.

1

⁺ DAt verdroot Ionam seer, ende werdt toornich,

+ A vers 1

2

Ende badt totten HEERE, ende sprack: Och HEERE, dat ist, dat ick seyde, doen ick noch in mijnen lande was,^† Daerom woude ick oock dat voorcomen, met vlieden ter See.^* Want ick wetet, dat ghy ghenadich, barmhertich, lanckmoedich, ende van grooter goedertierenheyt zijt, Ende dat ghy v laet rouwen des quaets.

† Iona. 1.a.3.

* Psal. 86.a.5. 145.a.8. Ioel. 2.c.13. Ezo. 34.a.6.

3

^† So neemt doch nv HEERE, mijn siele van my, want ick wilde lieuer doot zijn, dan leuen.

† 3.Re. 19.a.4 Tob. 3.a.6.

4

Maer de HEERE sprack: Meynt ghy dat ghy van rechts weghen gram zijt?

5

Ende Ionas ghinck ter stadt wt, ende stelde hem Oostwaerts teghen de stadt, Ende hy maecte hem seluen aldaer een Hutte, daer ghinck hy onder sitten in de schaduwe, tot dat hy sage, wat der Stadt gheschieden soude.

6

Maer Godt de HEERE bereyde een^* Cowoorde, die wies ouer Ionam, dat sy schaduwe gaf ouer zijn hooft, ende vermaeckte hem in zijn lijden. Ende Ionas verblijde hem seer van de Cowoorde.

* Kikaion.

7

⁺ Maer de HEERE bereyde eenen worm des morgens, doen de dagheraet aen quam, die stack de Cowoorde, dat sy verdorrede.

+ B vers 7

8

Als nv de Sonne opghegaen was, bereyde Godt eenen dorren Oosten wint, Ende de Sonne stac Ionam op dat hooft, also dat hy^† amachtich werdt. Doen wenschte hy zijnder sielen den doodt, ende sprack: Ick wilde lieuer doot zijn, dan leuen.

† Mat, flau.

9

Doen sprack Godt tot Ionam: Meynt ghy dat ghy met recht gram zijt om de Cowoorde? Ende hy sprack: Te recht ben ick ter doodt toe toornich.

10

Ende de HEEre sprack: V iammert der Cowoorden, daer ghy niet aen ghearbeyt en hebt, en hebtse oock niet op gebracht, welcke binnen eender nacht wert, ende binnen eender nacht verdorf.

11

Ende en soude my dan niet iammeren Niniue sulcker^† grooter stadt? Inder welcker meer zijn dan hondert ende twintich duysent menschen, die geen onderscheyt en weten wat Rechts oft slincx is, Daer toe ooc so vele dieren.

† Gene. 10.b.11.

¶ Eynde des Propheets Iona.