Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Na dien beual hem Godt weder tot Niniue te gaen, haer de straffinge Godts te vercondighen, waer si haer niet en beterden.

1

⁺ ENde dat woort des HEEREN gheschiede anderwerf tot Ionam, ende sprack:

+ A vers 1

2

^† Maect v op, gaet in de groote stadt Niniue, Ende predict haer^† de predicatie die ick v segghe.

† Ionas. 1.a.2.

† Ierem. 1.c.17.

3

Doen maecte hem Ionas op, ende ginc henen nae Niniue, ghelijc als de HEEre gheseyt hadde. Niniue was een stadt Godts, drie dachreysen groot.

4

Ende doen Ionas began daer in te gaen een dachreyse predicte hy, ende sprac: Daer zijn noch veertich daghen toe, soo sal Niniue vergaen.

[p. 85r]

5

Doen gheloofden de Lieden tot Niniue aen Godt,^* Ende deden wtroepen een vasten, ende toghen sacken aen, beyde groot ende cleyne.

* Psal. 69.b.11. Mat. 12.d.41 Iere. 36.b.9.

6

Ende doen dat voor den Coninck tot Niniue quam, stont hy op van zijnen throne, ende leyde zijn purpur af,^† ende nam eenen sack om hem, ende sette hem in de asschen.

† Esaie. 37.a.1.

7

Ende hy dede wt roepen, ende segghen tot Niniue, wt beuel des Conincx ende zijnder gheweldigen aldus: Daer en sal noch mensch, noch beest, noch osschen, noch schapen yet proeuen, ende men en salse niet weyden, noch water laten drincken.

8

Ende beyde menschen ende dieren sullen sacken om haer nemen, ende crachtelijc tot Godt roepen.^† Ende een yegelijck bekeere hem van zijnen boosen wech, ende van de vermetenheyt zijnder handen.

† Iere. 18.a.11.

9

^* Wie wetet, Godt mocht hem bekeeren, ende berou crijghen, ende hem weynden van zijnen grammigen toorne, dat wy niet en verderuen.

* Iohel 2.c.14.

10

Maer doen Godt hare wercken sach, dat sy haer bekeerden van haren boosen wech, beroude hem des ongelucx, dwelc hy^† ghesproken hadde haer te doen, ende hy en dedes niet.

† Voorghenomen.