Den Bibel, Inhoudende dat Oude ende Nieuwe Testament (Biestkensbijbel)

[p. 84r]

¶ De Propheet ObadIa.

¶ Dat eerste Capittel.

¶ Hy propheteert teghen den stouten hoochmoet der Edomiten, die welcke den kinderen Israels in haren iammer veel leets ghedaen hebben, welcken iammer ouer haer gaen sal.

1

⁺ DIt is dat ghesicht ObadIa^† Alsoo spreeckt de HEERE HEEre van Edom: Wi hebben vanden HEERE gehoort, datter een Ambassaet onder de Heydenen ghesonden is: Wel op, ende laet ons tegen haer strijden.

+ A vers 1

† Ezech. 25.b.13 35.a.2. Amos. 1.c.11.

2

^† Siet, Ick heb v gheheel cleyn ghemaect onder de Heydenen, ende seer veracht.

† Iere. 49.c.15.

3

Den hoochmoet dijnder herten heeft v bedrogen, om dat ghy inde Clippen der Steenrootsen woont, op uwe hooghe Sloten, ende segt in uwer herten: Wie wil my ter neder stooten?

4

Oft^* ghy al in de Hoochte voert, gelijck als eenen Arent, ende maecte dijnen Nest tusscen de Sterren, Nochtans wil ick v daer af ter neder stooten, spreect de HEERE.

* Amos. 9.a.2. Abac. 3.b.5. Iere. 49.c.16. Tren. 4.c.19.

5

Wanneerder Dieuen oft Verdestrueerders inder nacht ouer v comen sullen?⁺ O hoe sult ghy dan te niet worden? Ia si sullen ghenoech stelen. Ende wanneer de Wijnlesers ouer v comen, soo en sullen si v geen nalesen laten ouer blijuen.

+ B vers 5

6

O, hoe sullen si den Esau ondersoecken, ende sine schatten soecken.

7

Alle dijne eyghen Bontghenooten sullen v ten Lande wtstooten. De Lieden daer ghy dijnen troost opsettest, sullen v bedriegen ende ouerweldighen. Die v broot eten, die sullen v verraden, eer ghijt mercken sult.

8

Wat gheldet, spreeckt de HEERE,^† Ick wil ter seluer tijt de Wijsen tot Edom, te niet maken, ende de cloecheyt op dat gheberchte Esau?

† Esai. 29.c.14. 2.Corin. 1.c.19

9

Wandt dijne stercken tot Theman, sullen versaghen, Op dat si alle opt gheberchte Esau door den moort wtgheroeyt worden.

10

Om des gewelts ende onrechts wille^* aen uwen broeder Iacob bedreuen. Ter seluer tijt, doen ghy hem wederstont,

* Exodi. 17.c.8. Num. 20.c.20

11

Doen de vreemde zijn Heyr gheuangen wech voerden, ende Buytenlantsche tot zijnder Poorten in toghen, ende ouer Ierusalem dat lot worpen, doen waert ghy als der seluer een.

12

Daerom suldy tot alle schande comen, ende eewelijc wtgheroeyt zijn.⁺ Ghy en sult uwen lust alsoo niet meer sien aen uwen broeder, in-der tijt zijnder allenden. Ende ghy en sult v niet verblijden, ouer de kinderen Iuda ter tijt haers iammers. Ende ghy en sult met uwen monde niet meer so vermetelijck spreken, ter tijt haers angsts.

+ C vers 12

13

Ghy en sult inde Poorten mijns volcx niet meer in trecken, ter tijt haers iammers. Ghy en sult niet meer sien uwen lust aen haer ongheluc, ter tijt haers iammers.

14

Ghy en sult oock niet tegen zijn Heyr wtseynden, ter tijt zijns iammers. Ghy en sult oock niet meer staen aen de scheydtweghen, om zijn ontloopene te vermoorden. Ghy en sult oock sine ouerghebleuene niet verraden, ter tijt zijns angsts.

15

Want den dach des HEEREN is nae by, ouer alle Heydenen.^† Ghelijck ghy ghedaen hebt, alsoo sal v weder gheschieden: Ende alsoo ghy verdient hebt, alsoo salt v weder op uwen Cop comen.

† Ierem. 50.c.15 e.29. Ioel. 3.b.8. Abac. 2.b.12.

16

^* Want gelijckerwijs ghy op mijnen Heylighen berch gedroncken hebt, Also sullen alle Heydenen rontsom daghelijcx drincken. Iae si sullent wtsuypen ende verslinden, dattet alsoo gestelt sy, als en waerder noyt niet gheweest.

* Matt. 7.a.2

17

⁺ Maer op den berch Sion sullen noch sommige verlost worden, die sullen Heylichdom zijn,

+ D vers 17

18

^* Ende dat huys Iacobs sal sine Besitters besitten.^† Ende dat huys Iacobs sal een vier worden, ende dat huys Iosephs een vlamme: Maer dat huys Esaus, stroo. Dat sullen si aensteken, ende verslinden, dat den huyse Esaus niet ouer en blijue. Want de HEERE heuet ghesproken.

* Sacha. 2.b.9

† Sac. 12.b.6. Ierem. 5.c.14

19

Ende die teghen het Suyden, sullen dat geberchte Esaus, Ende die inde valleyen, sullen de Philisteen besitten, Ia si sullen dat velt Ephraim, ende dat velt Samarie, besitten, ende BenIamin den Berch Gilead.

20

Ende de verdreuene deses Heyrs, der kinderen Israels, die onder de Chananiten tot Sarphath toe zijn, ende de Verdreuene der Stadt Ierusalems, die te Sepharad zijn, sullen de Steden teghen het Suyden besitten.

21

Ende^* Heylanden sullender op comen opten Berch Sion, om dat gheberchte Esau te oordeelen.^† Alsoo sal dat Conincrijck des HEEREN zijn.

* Beschermers

† Sach. 14.b.9

¶ Eynde des Propheets ObadIa.