Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ Van de straffinghe des volcx Iuda, van de macht Godts, Een troostelijcke belofte, dat hijse wil weder vergaderen, ende in genaden nemen, dwelcke op dat rijcke Christi behoort, dat tsamen beyde de Ioden bekeert, ende de Heydenen ontfanghen sullen worden.

1

⁺ ICk sach den HEERE op den Altaer staen, ende hy sprack: Slaet aenden knoop, dat de Posten beuen. Wandt hare ghiericheydt sal haer allen op haer hooft comen, ende ick wil hare nacomelinghen metten Sweerde vermoorden,^* Alsoo oock, dat haerder gheen ontulieden, noch yemant ontgaen en sal.

+ A vers 1

* 1.Mac. 6.d.26 Psal. 139.a.8.

2

^† Ende oft si haer al schoon inde Helle begroeuen, so salse nochtans mijn hant van daer halen. Ende oft si op inden Hemel clommen, Soo wil icse nochtans ter neder stooten.

† Abdi. 1.a.4. Iere. 49.c.16.

3

Ende oft si haer bouen opten Berch Carmel verborghen, Soo wil icse nochtans aldaer soecken, ende daer af halen. Ende oft si haer voor mijnen ooghen verborghen inden afgront der zee, Soo wil ick nochtans den Slangen beuelen, dat sise aldaer steken sullen.

4

Ende oft si voor hare Vianden gheuanghen henen ghinghen, Soo wil ick nochtans den sweerde beuelen, dattet haer aldaer dootslaen sal. Want ick wil mijne ooghen op haer houden tot^† ongeluc, ende niet totten goede.

† Iere. 44.b.11

5

Wandt de HEERE HEEre Sebaoth is sulck een man, Als hi een Lant aen roert, so versmeltet, dat alle Inwoonders trueren moeten. Dattet ouer haer gansch loopen sal, als een water, ende ouer swemt worden, ghelijck den vloet in Egipten doet.

6

⁺ Hy ist,^† die zijn Sale inden Hemel sticht, ende zijn Hutten op de Aerde fundeert.^* Hy roept dat water in de zee, ende ghietet op Aertrijcke, HEERE is sinen Naem.

+ B vers 6

† 3.Re. 8.g.49.

* Amos. 5.b.8.

7

En zijt ghy kinderen Israels, my niet als de Mooren? Spreect de HEERE. En hebbe ick Israel niet wt Egipten gheleyt, Ende de Philisteen wt^† Caphthor, Ende de Syriers wt Kyr?

† Gen. 10.b.14

8

Siet, de ooghen des HEEREN HEEren sien op een sondich Coninckrijcke, dat ict vanden Aertbodem gansch verniele.^* Hoe wel dat ick dat huys Iacobs niet gansch vernielen en wil, spreect de HEEre,

* Iere. 30.b.11. Sacha. 13.b.8 Roma. 8.c.27

9

Nochtans siet, Ick wilt beuelen, ende dat huys Israels onder alle Heydenen laten siften, ghelijck alsmen met een Seue sift, Ende de Coornkens en sullen niet opter Aerden vallen.

10

Alle Sondaren in mijnen volcke, sullen doort sweert steruen, die daer seggen: Dat ongheluck en sal soo na by niet zijn, noch ons ontmoeten.

11

^+† Ter seluer tijt wil ick de veruallen Hutte Dauids weder oprechten, ende haer gaten verthuynen, Ende soo wat afghebroken is, weder repareren, Ende wilse optimmeren, ghelijck si in voorleden tijden gheweest is.

+ C vers 11

† Actu. 15.c.16. Mich. 7.b.11.

12

Op dat si besitten de ouergebleuen te Edom, ende de ouergebleuene onder alle Heydenen, ouer de welcke mijnen Naem gepredict sal worden, seyt de HEEre, die alsulcx doet.

13

Siet, de tijt coemt, spreect de HEERE, datmen tseffens ploeghen ende oogsten, Ende op een tijt, den wijn perssen, ende saeyen sal.

14

^† Ende de Berghen sullen van soeten wijn druypen, ende alle Hueuelen sullen vruchtbaer zijn.^‡ Want ick wil de gheuanckenisse mijns volcks Israels weynden, dat si de woeste steden bouwen ende bewoonen sullen, wijngaertackers planten, ende wijn daer af drincken,

† Ioel. 3.c.18.

‡ Ezech. 16.f.53

15

Houen maken, ende vruchten daer wt eten. Want ick wilse in haer Lant planten, dat si niet meer wt haren Lande wtgheroeyt en sullen worden, dwelcke ick haer geuen sal, spreect de HEEre dijn Godt.

¶ Eynde des Propheets Amos.