Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ Menigherley openbaringhen gheschieden den Propheet, inden welcken hem Godt de straffinghe des Lants ende des volcx te verstaen gheeft.

1

⁺ DE HEERE HEERE toonde my een ghesicht, Ende siet, daer stont een die Sprinckhanen maecte, inden beghinne doen dat^† nagras op ghinck, ende siet, dat nagras stont, Nae dien dat de Coninck sine Schapen hadde laten scheeren.

+ A vers 1

† Toemaet.

2

Als si nv dat cruyt inden Lande gansch af eten wouden, doen sprack ick: Ach HEERE HEERE weest ghenadich. Wie wil Iacob weder op helpen? Wandt hy is ymmers seer cleyn.

3

Doen beroudet den HEEre, ende sprack: Wel aen, ten sal niet gheschieden.

4

De HEERE HEEre toonde my een ghesichte, ende siet, de HEEre HEEre riep dat vier, om daer mede te straffen. Dat soude een groote diepte verteren, ende verslinde alreede een deel wech.

5

Doen seyde ick: Ach HEEre HEEre, laet af. Wie wil Iacob weder op helpen? Want hy is ymmer seer cleyne.

6

Doen beroude dat den HEEre ooc, ende de HEERE HEEre sprack: Ten sal oock niet gheschieden.

7

⁺ Maer hy vertoonde my dit gesichte, ende siet, de HEERE stont op eenen muere met een richtsnoer gemeten,^* ende hy hadde dat richtsnoer in zijnder hant. Ende de HEERE sprac tot my: Amos wat siet ghy? Ick sprack: Een richtsnoer.

+ B vers 7

* Sacha. 2.a.1. Apoca. 21.c.15

8

Doen sprac de HEEre tot my: Siet, ick wil een richtsnoer midden door mijn volck Israels trecken, ende hem niet meer voorby gaen.

9

Maer de Hoochten Isaac sullen verwoest, ende de kercken Israels verdestrueert worden.^* Ende ic wil mi metten Sweerde op maken, ouer dat huys Ierobeams.

* 4.Re. 17.a.6.

10

Doen sant Amazia de Priester te BethEl, tot Ierobeam den Coninc Israels, ende dede hem seggen:^† Amos maect een oproer tegen v inden huyse Israels. Dat Lant en can zijn woorden niet gelijden.

† 3.Re. 18.b.17.

11

Want Amos spreect also: Ierobeam sal doort Sweert steruen, ende Israel sal wt sinen lande gheuangen wech geuoert worden.

12

Ende Amasia sprac tot Amos: Ghy Siender, Gaet wech, ende vliet int lant Iuda, ende gheneert v aldaer, ende propheteert aldaer.

13

^* Ende en propheteert niet meer tot BethEl, Want het is des Conincks stichtinghe, ende de Conincrijcx huys.

* Esaie. 30.b.10 Ierem. 11.d.21 Amos. 2.b.9.

14

⁺ Amos antwoorde ende sprac tot Amasia:^† Ick en ben gheen Propheet, noch gheens Propheten soon, Maer ick ben een koeherder die de Moerbesien af pluct.

+ C vers 14

† Sacha. 13.a.5 Amos. 1.a.1.

15

Maer de HEERE nam my vander Cudden, ende seyde tot my: Gaet henen, ende propheteert mijnen volcke Israels.

16

Daerom hoort nv des HEEREN woort. Ghy segt: En propheteert teghen Israel niet, ende en predict niet tegen dat huys Isahaks.

17

Daerom spreeckt de HEEre alsoo: Dijn wijf sal inder stadt ter Hoeren worden, Ende uwe sonen ende dochteren sullen doort sweert vallen, ende uwen Acker sal metter coorde wtgedeylt worden. Maer ghy sult in een onreyn Lant steruen,^† Ende Israel sal wt sinen Lande verdreuen worden.

† 4.Re. 17.c.18