Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Hy berispt den staet des volcx, ende datter niemant en is die de schade ter herten neemt.

1

⁺ VVee den stouten tot Sion, ende den genen, die haer op den Berch Samarie verlaten, die haer houden voor de voornaemste ouer de Heydenen, ende gaen daer stoutelijck inden huyse Israels.

+ A vers 1

2

Gaet henen na Kalne, ende siet toe, Ende van daer na Hemath der groter stadt, Ende trect henen af na Gad der Philisteen, De welcke beter Coninckrijcken gheweest zijn dan dese, ende hare Lantpalen grooter dan uwe Lantpalen.

3

Ghy die v verre vanden quaden dach acht te wesen, ende staet altoos nae vermeten regiment,

4

Ende slaept op yuoren legheren, ende bedrijft oueruloedicheydt met uwe bedden.

5

Ghy eet de Lammeren vander Cudden, ende de gemeste Calueren,^† ende speelt op den Psalter,^* ende ghy dichtet v liedekens als Dauid,

† Iob. 21.b.11. Esaie. 5.b 12.

* 1.Re. 16.d.23 2.Reg. 6.a.5.

6

Ende drinct wijn wt de schalen, Ende salft v met Balsem, Ende en becommert v niet om de schade Iosephs.

7

Daerom sullen si nv voor aen gaen, onder den ghenen die daer geuanghen wech gheuoert worden, Ende dat brassen der gulsigher sal ophouden.

[p. 83r]

8

^+† Wandt de HEERE HEERE heeft gesworen, by zijnder sielen, spreect de HEERE de Godt Sebaoth. My verdriet de hooueerdie Iacobs, ende hate oock hare Palleysen, Ende ick wil de stadt oock ouergheuen, met alle tgene dat daer in is,

+ B vers 8

† Iere. 51.c.14. Amos. 8.a.7.

9

Ende ofter al thien mannen in eenen huyse ouerbleuen, so sullen si doch steruen,

10

Dat eenen yeghelijcken zijn Oom van des Vaders weghen, ende zijn Oom van des Moeders wegen, nemen, ende de gebeenten wt den huyse dragen moet. Ende segghen totten genen die inder Cameren des huys is: Isser ooc noch meer daer? Ende die sal antwoorden: Sy zijn alle wech. Ende sal segghen: Sijt te vreden,^† Wandt si en wouden niet, datmen den Naem des HEEREN soude ghedencken.

† Deut. 8.d.19.

11

Want siet, de HEERE heeft beuolen, datmen de groote huysen slaen soude, datse reten crijghen, Ende de cleyne huysen, datse gaten crijghen.

12

Wie can met Peerden rennen, oft met Osscen ploeghen op de steenrootsen? Want ghy verandert dat recht in galle, ende de vrucht der gherechticheyt in Alsem,

13

Ende ghy vertroost v dies, dat so gheheel ydel is, ende segt: En zijn wy dan niet sterc ghenoech met onse hoornen?

14

Daerom siet, Ick wil ouer v, O ghy vanden huyse Israels, een volc verwecken, seyt de HEERE de Godt Sebaoth, dwelc v benauwen sal, van de plaetse aen, daermen nae Hemath gaet, tot aen de Beke inder woestijnen.