Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ Een claghe ouer den val Israels, Hy verwijt haer de weldaden Gods, Ende vermaentse tot beteringhe.

1

⁺ HOort ghy vanden huyse Israels dit woort, want ic moet dit claechliedeken ouer v maken.

+ A vers 1

2

De Maghet Israels is gheuallen, dat si niet weder op en sal staen. Sy is ter Aerden ghestooten, ende daer en is niemandt, diese op helpe.

3

Want also seyt de HEEre Godt, de stadt daerder duysent wtgaen, die en salder maer hondert ouer behouden. Ende daerder hondert wtgaen, die en salder maer thien ouer behouden inden huyse Israels.

4

Daerom spreect de HEERE alsoo totten huyse Israels: Soeckt my, soo sult ghy leuen.

5

En soeckt^* BethEl niet, Ende en coemt tot^† Gilgal niet, Ende en gaet niet na Berseba. Want Gilgal sal geuangen wech geuoert worden, Ende BethEl sal BethAuen worden.

* 3.Re. 12.d.29.

† Amo. 4.b.4 Hozee. 9.c.15. 12.b.11.

6

^* Soect den HEERE so sult ghy leuen, op datter niet een vier inden huyse Iosephs de ouerhant en neme, dat daer vertere, ende dattet niemandt blusschen en conne te BethEl:

* Esa. 55.a.6. Soph. 2.a.3.

7

Ghy die dat recht in Alsem verandert, ende de gherechticheyt ter Aerden stoot.

8

Hy maect dat Seuenghesterte ende^† Orion, Die vander duysternisse den morgen, ende van den dach den duysteren nacht, maect.^* Die dat water inder zee roept, ende gietet opten Aertbodem, hy heet HEERE.

† Iob. 9.a.9.

* Amos. 9.b.6.

9

⁺ Die ouer de stercken een verstooringhe aenricht, ende brengt een verstooringe ouer de vaste stadt.

+ B vers 9

10

Maer si zijn opten genen gram, diese inder poorten straft, Ende houden dien voor eenen grouwel, die daer heylsaem leert.

11

Daerom want ghy de armen onderdruct, ende neemt dat Coorn met groote lasten van haer,^* So en sult ghi inde huysen niet woonen, die ghi van gehouwen steenen ghetimmert hebt, Ende den wijn niet drincken, dien ghy inde lustige Wijngaerden geplant hebt.

* Deut. 28.c.30. Sopho. 1.c.13

12

Want ic weet uwe ouertredinghen, welcker vele is, ende uwe sonden die daer sterc zijn.^† Hoe dat ghy de Rechtuaerdige dringet, ende bloetghelt neemt, ende de Armen inder poorten onderdruct.

† Exod. 23.a.6. Miche. 3.c.11.

13

Daerom moet de^† Cloecke ter seluer tijt swijgen,^* Want het is een boose tijt.

† Verstandige.

* Mich. 2.a.3.

14

Soect dat goet ende niet dat quaet, op dat ghy leuen muecht, Soo sal de HEERE de Godt Sebaoth by v zijn, ghelijc ghy roemt.

15

^* Haet dat quaet, ende hebt lief dat goet,^† Bestellet dat recht inder poorten, Soo sal de HEERE de Godt Sebaoth, den ouerghebleuen in Ioseph ghenadich zijn.

* Psal. 97.b.10. 34.b.15. 37.d.27. Rom. 12.b.9.

† Deu. 17.a.1.

16

⁺ Daerom soo spreect de HEERE de Godt Sebaoth, de HEEre: Daer sal in alle straten een claghe zijn, Ende op alle straten salmen segghen: O wee, O wee. Ende men sal den Ackerman tot trueren roepen, ende tot weeclage, wie slechs weenen can.

+ C vers 16

17

In alle Wijngaerden sal een weeninghe zijn. Wandt ick wil onder v omgaen, spreect de HEEre.

18

Wee den ghenen,^† die des HEEren dach begeeren. Wat sal hy v? Want des HEEren dach is een duysternisse, ende niet een licht.

† Ierem. 30.b.7 Ioelis. 2.a.1. Soph. 1.c.14 Esaie. 13.b.6.

19

Ghelijck als oft yemant voor eenen Leeuwe vlode, ende hem ontmoetede eenen Beyre. Ende ghelijck als oft yemant in een huys quame, ende lende met zijnder hant aen de Wandt, ende dat hem een Slanghe stake.

20

Wandt des HEEren dach sal duyster ende niet licht zijn, doncker ende niet claer.

21

^+* Ic ben op uwe vierdagen gram, ende verachtese, ende ic en can niet riecken in uwe vergaderinghe.

+ D vers 21

* Esaie. 1.b.14.

22

Ende^† oft ghy my al Brantoffer ende Spijsoffer offert, soo en heb icker doch gheen behaghen aen. Iae uwe vette Dancofferen en mach ick oock niet aensien.

† Ierem. 6.c.20 Esaie. 1.b.11.

23

Doet slechs dat ghebleer uwer liedekens van my wech. Want ick en mach v Psalterspel niet hooren.

24

Maer dat recht sal geopenbaert worden, ghelijck water, ende de gherechticheyt ghelijck eenen stercken stroom.

25

^† Hebt ghi vanden huyse Israels, my ooc inde woestijne de veertich iaer lanc, Slachoffer ende Spijsoffer geoffert?

† Actu. 7.c.42. Iere. 7.c.20.

26

Ia wie? Ghy droecht den Sicchuth uwen Coninc, ende Chium uwe Beelden, de Sterren uwer Goden, die ghy v seluen ghemaeckt hadt.

27

Daerom wil ick v van hier na Damascon laten wech voeren, seyt de HEERE^* die daer Godt Sebaoth heet.

* Amos. 4.c.13.