Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Hy verwijt haer hare misdaden, ende openbaert de toecomende straffinge, ende hy vermaentse tot wederkeeringhe.

1

⁺ HOort dit woort, ghy vette koeyen, die op den Berch Samarie zijt, ende den behoeftighen onrecht doet, ende vertreet de Armen, ende segt tot uwe Heeren: Brengt herwaerts, laet ons suypen.

+ A vers 1

2

De HEEre HEEre heeft ghesworen bi zijnder heylicheyt: Siet, de tijt coemt, ouer v, datmen v wtrucken sal met Anghelen, ende uwe nacomelingen met visch haken.

3

Ende ghy sult^† door de Reten wt gaen, een yeghelijck voor hem henen, ende nae Harmon wech gheworpen worden, spreect de HEERE.

† Hier ende daer verspreyt.

4

⁺ Ia, coemt herwaerts tot^* BethEl, ende bedrijft sonde, ende tot^† Gilgal, dat ghy der sonden veel muecht maken, Ende brengt uwe offerenhanden des morghens, ende uwe thienden des derden daechs.

+ B vers 4

* Iosue. 16.a.1. 3.Reg. 12.d.29

† Osee. 4.c.15 9.c.15. 12.b.11.

5

Ende wierooct van dat suer deech, totten Dancoffer, ende predict van eenen vrijwilligen offer, ende roepet wt, want also hebt ghijt gheerne, ghy kinderen Israels, spreect de HEEre HEEre.

6

Daerom heb ic v oock, in alle uwe steden^† geruste tanden ghegheuen, ende ghebreck aen broot, in alle uwe plaetsen, Ende nochtans en bekeerde ghy v niet tot my, spreeckt de HEERE.

† Ledighe.

7

^† Oock hebbe ick den reghen ouer v opghehouden tot dattet noch drie maenden waren totten oogst toe. Ende ick liet ouer deen stadt regenen, ende ouer dander stadt, en liet ic niet reghenen. Den eenen Acker wert bereghent, ende den anderen Acker, die niet bereghent en werdt, verdorrede.

† Deut. 11.b.14 28.b.12. Ierem. 14.a.3 Ioel. 2.c.23.

8

Ende twee oft drie steden, togen tot eender stadt, op dat si water drincken mochten, ende si en condens niet genoech vinden. Noch en bekeerde ghi v niet tot my, spreect de HEEre.

9

Ick^* plaechde v met dorre tijt, ende met den brant Coorn, Desghelijcx atent oock de Rupsen al op, so wat in uwe Houen,⁺ Wijngaertackers, Vijgheboomen ende Olijfboomen wiesch, Ende nochtans en bekeerde ghy v niet tot my, spreect de HEERE.

* Hagge. 2.c.18

+ C vers 9

10

Ick sant Pestilencie onder v,^* ghelijc als in Egipten. Ick doode uwe Ionghe ghesellen metten sweerde, ende liet uwe Peerden gheuanghen wech voeren. Ick liet den stanck van uwen heyrleger in uwe nuesen gaen. Nochtans en bekeerde ghy v niet tot my, seyt de HEEre.

* Exod. 9.a.3.

11

Ick keerde sommige onder v, omme, ghelijck God,^† Sodoma ende Gomorra omkeerde, dat ghi waert als eenen brant, die wt den viere ghetogen wort, Nochtans en bekeerde ghy v niet tot my, spreect de HEERE.

† Gen. 19.c.24.

[p. 82v]

12

Daerom wil ic v voortaen also doen. Israel. De wijle ic v dan also doen wil. Soo^† schict v Israel, ende gaet uwen God te ghemoet.

† Bereydt.

13

Wandt siet, hy ist, die de Berghen maect,^* den wint schept, ende geeft den mensche te kennen, wat hi spreken sal. Hy maect de dagheraet, ende de duysternisse, Hy gaet op de Hoochten der Aerden,^* hy heet HEERE Godt Sebaoth.

* Ierem. 10.c.13 15.c.16.

* Esaie. 48.a.2 51.c.15. 54.a.5 Ie. 31.f.35. 46 c.18. 48.c.15.