Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ God de HEEre en straft niet, ten sy dat hy eerst te voren gewaerschout heeft door sine Propheten, waerom soo wie de waerschouwinghe niet ter herten en nemen, die worden met rechte gheplaecht.

1

⁺ HOort, wat de HEERE met v spreect, ghy kinderen Israels, te weten, met alle gheslachten, die ic wt Egipten lande gheleyt hebbe, ende sprack:

+ A vers 1

2

^† Van alle geslachten op Aerden heb ick alleen v aengenomen. Daerom wil ic v ooc besoecken in alle uwe misdaden.

† Deut. 4.c.20.

3

Moghen daer ooc twee tsamen wandelen, ten sy dat zijs met malcanderen eens zijn?

4

Brult oock eenen Leeuwe in een wout, als hy gheenen roof en heeft?^* Crijscht ooc een ionge Leeuwe wt sinen hole, ten sy dat hy wat hebbe geuangen?

* Iob. 6.a.5.

5

Valt ooc eenen vogel inden strick opter Aerden, daer gheenen Voghelaer en is? Heftmen oock den strick vander Aerden op, die noch niet geuangen en heeft?

6

Blaestmen oock de Basuynen in eender stadt, dattet volck hem daer niet af en ontsettet?^* Isser oock een ongeluc inder stadt, dat de HEERE niet en doe?

* Treno. 3.d.37 Eccle. 11.b.5.

7

⁺ Want de HEEre HEEre en doet gheen dinck, ten sy dat hy sinen knechten den Propheten sine heymelijcheyt openbare.

+ B vers 7

8

De Leeuwe brullet, wie en soude niet versaecht zijn? De HEERE HEERE spreect, wie en soude niet propheteren?

9

Vercondiget inden Palleysen tot Asdod, ende inde Palleysen inden lande Egipti, ende segt: Vergadert v op de Bergen Samarie, ende siet, wat grooter onrecht ende iammergheschrey dat daer in is.

10

Sy^† en achten op geen recht, seyt de HEEre: Maer vergaderen schatten met Violencie, ende roouen in hare Palleysen.

† Ierem. 5.d.26

11

Daerom spreect de HEEre HEEre alsoo: Men sal dit Lant rontom belegeren, ende v van uwer macht ter neder stooten, ende uwe huysen plonderen.

12

⁺ Also spreect de HEEre: Ghelijck als een Herder den Leeuwe twee knien, oft een oorlapken wt den monde ruct, Alsoo sullen de kinderen Israels wtgeruct worden, die te Samaria woonen, ende hebben inde hoecken een bedde, Ende tot Damasco een Coetse.

+ C vers 12

13

Hoort, ende betuyghet inden huyse Iacobs, spreect de HEEre HEEre, de Godt Sebaoth,

14

Wandt tot dier tijt, als ick de sonden Israels besoecken sal,^* Soo wil ick de Altaren tot BethEl besoecken, ende de hoornen des Altaers af breken, also dat si ter Aerden neder vallen sullen.

* 3.Reg. 12.d.33

15

Ende ick wil beyde dat Winterhuys ende Somerhuys slaen, Ende de yuoren huysen sullen vergaen, ende veel huysen verdoruen worden, seyt de HEERE.